Пытанне: амаль штодзень чуеш пра тое, як людзей, асабліва пажылых, падманваюць махляры. Як засцерагчыся ад дзеянняў злачынцаў?
Адказвае старшы ўчастковы інспектар міліцыі Аляксандр Скварчынскі:
– У адносінах да пажылых людзей абсалютна ўсе ашуканцы дзейнічаюць з дапамогай тэлефонных званкоў (як правіла, Вайбер, Тэлеграм). Першы званок можа быць пад рознай прычынай. Напрыклад, прадстаўнік абслугоўваючай арганізацыі будзе прапаноўваць паслугі па замене лічыльнікаў або дамафона па зніжаным кошце; работнік паліклінікі пераконвае, што ажыццяўляецца пераход на электронны від паслуг і трэба зверыць даныя. “Прыйшла пасылка”, “Пералічылі пенсію”, “Скончыўся дагавор на аказанне паслуг сувязі” – усе гэтыя лжывыя прычыны для таго, каб атрымаць персанальныя даныя або код з СМС. Як толькі пацярпелы агучыць іх, паступіць другі званок. Тэлефануючы прадстаўляецца супрацоўнікам праваахоўных органаў і пераконвае, што вы мелі стасункі з ашуканцамі або тыя завалодалі персанальнымі данымі і цяпер на ваша імя афармляюць крэдыт.
Наступны крок злачынцаў – запалохаць крымінальным праследаваннем. Паступяць пагрозы аб правядзенні па месцы жыхарства вобыску, канфіскацыі ўсіх наяўных зберажэнняў. Каб пазбегнуць праблем з законам, прапануюць тэрмінова задэклараваць наяўныя грашовыя сродкі. Вядома ж, “усе грошы пасля праверкі абавязкова вернуць”. Як мага хутчэй іх неабходна перавесці на “бяспечны рахунак”. Ашуканцы прапануюць перадаць іх кур’еру, які назаве кодавае слова.
Таксама ў адной са схем будуць пераконваць, што праводзіцца спецыяльная аперацыя і ловяць ашуканцаў. Для гэтых мэт спатрэбіцца забраць грашовыя сродкі ў невядомай асобы, пасля чаго атрыманыя зберажэнні варта перадаць “нашаму супрацоўніку”. Так махляры называюць сваіх памочнікаў, якія наўмысна ідуць на злачынства дзеля заробку і дзейнічаюць па ўказанні куратараў.
Як толькі грошы будуць узятыя ў іншай асобы – гэта саўдзельніцтва ў злачынстве, адказнасць за якое прадугледжана артыкулам 209 Крымінальнага кодэкса.
Запомніце і раскажыце пра гэта сваім бацькам: праваахоўнікі, работнікі банкаўскіх і іншых установаў не патрабуюць ад грамадзян праводзіць якія-небудзь маніпуляцыі з фінансамі (задэклараваць, пакласці на бяспечны рахунак, аддаць кур’еру і г.д.); не трэба згаджацца забіраць у незнаёмцаў пакеты з грашыма або невядомым змесцівам; атрымаўшы такую просьбу, неабходна неадкладна спыніць размову і паведаміць пра гэта па тэлефоне “102” ці ў чат-бот “Мы заўсёды побач!”.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
