У чацвер, 19 студзеня, у раёне – Адзіны дзень інфармавання насельніцтва. Яго тэма – “2017 год у Беларусі – Год навукі”. Працоўныя калектывы наведалі інфармацыйныя групы.
У Дзятлаўскім жылкамунгасе працавала адна з інфармацыйных груп.
З інфармацыяй па тэме “2017 год у Беларусі – Год навукі” перад прысутнымі выступіла намеснік начальніка аддзела адукацыі, спорту і турызму райвыканкама А. Жадзейка. Яна, у прыватнасці, адзначыла, што ў XXI стагоддзі беларуская навука адыгрывае ключавую ролю ў рэалізацыі стратэгіі інавацыйнага развіцця на аснове ўкаранення вынікаў навуковых даследаванняў і распрацовак у рэальны сектар эканомікі.
23 снежня 2016 года Прэзідэнт Рэспублікі Беларусь А. Лукашэнка падпісаў Указ № 481 “Аб аб’яўленні 2017 года Годам навукі”.
Указ прыняты дзеля павышэння ролі навукі ў выкананні задач сацыяльна-эканамічнага развіцця краіны, стварэння спрыяльных умоваў для захавання і развіцця навуковага патэнцыялу, фарміравання міжнароднага іміджу Беларусі як краіны з высокім узроўнем інтэлектуальнага і чалавечага капіталу.
Ураду даручана з удзелам Нацыяльнай акадэміі навук Беларусі, аблвыканкамаў, Мінскага гарвыканкама распрацаваць і зацвердзіць рэспубліканскі план мерапрыемстваў па правядзенні ў 2017 годзе Года навукі, які адлюстроўвае ўзаемадзеянне навукі з сацыяльнай сферай, галінамі эканомікі, інавацыйную дзейнасць, міжнароднае навукова-тэхнічнае супрацоўніцтва.
