Пракуратурай Дзятлаўскага раёна за 2020 год і 8 месяцаў 2021 года праведзена праверка і аналіз прычынаў і ўмоваў, што садзейнічаюць траўматызму непаўналетніх, эфектыўнасці і сістэмнасці мераў па іх ухіленні.
Абследавана прыдамавая тэрыторыя шматкватэрных дамоў, якія знаходзяцца на абслугоўванні Дзятлаўскага РУП ЖКГ і жыллёва-будаўнічых кааператываў, ацэнена, наколькі яна адпавядае патрабаванням бяспекі для знаходжання і гульняў дзяцей.
Па звестках цэнтральнай раённай бальніцы, пасля атрымання траўмаў у дварах за 8 месяцаў гэтага года медыцынская дапамога спатрэбілася 6 непаўналетнім, летась – 12.
Штогадовыя тэхнічныя агляды пляцовак прыдамавых тэрыторый дзяржаўнага жыллёвага фонду на захаванасць, надзейнасць і выяўленне дэфектаў сваімі сіламі праводзяць арганізацыі, якія ажыццяўляюць эксплуатацыю жыллёвага фонду або прадастаўляюць жыллёва-камунальныя паслугі. Пры выяўленні значных недахопаў – спецыялізаваныя арганізацыі.
На дзіцячых пляцоўках канструкцыя і памеры абсталявання павінны быць зручнымі, бяспечнымі, выключаць магчымае траўміраванне дзяцей; рухомыя часткі, калі з’яўляюцца крыніцай небяспекі, – агароджанымі; арэлі – з абмежавальнікамі, якія засцерагаюць ад перакульвання.
На жаль, праверка паказала, што гульнявыя збудаванні на асобных пляцоўках не адпавядалі гэтым патрабаванням, былі неадрамантаванымі, мелі тэхнічныя пашкоджанні.
Недахопы былі на пляцоўках у гарадскім пасёлку Наваельня і горадзе Дзятлаве. Сярод іх – незамацаваныя або зламаныя дошкі; цвікі, якія выступаюць над паверхняй; сапсаваныя арэлі (без дошачак на сядзенні або з незамацаванымі элементамі); парушаныя канструкцыі з небяспечнымі часткамі і выступамі.
Як паказвае практыка, неналежнае ўтрыманне дзіцячых пляцовак нярэдка становіцца прычынай няшчасных выпадкаў, звязаных з траўмаваннем непаўналетніх.
Пракуратурай было вынесена прадстаўленне з патрабаваннем ухіліць выяўленыя недахопы і прывесці ў адпаведны стан дзіцячыя гульнявыя пляцоўкі і збудаванні на дваровых тэрыторыях шматкватэрных жылых дамоў.
Віталій ЮРГО,
намеснік пракурора Дзятлаўскага раёна
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
