Марыя Слушко: “Перспектывы СВК “Хвінявічы” звязаны з жывёлагадоўляй”

Марыя Слушко, галоўны заатэхнік сельскагаспадарчага вытворчага кааператыву “Хвінявічы”:
— У хуткім часе беларусаў чакае падзея, якая вызначыць далейшыя перспектывы развіцця нашай дзяржавы на наступныя пяць гадоў. Вельмі прыемна, што стала дэлегатам V Усебеларускага народнага сходу. Мяркую, што шматгадовая работа ў сельскай гаспадарцы, набыты вопыт паспрыялі гэтаму.
Мінулая пяцігодка пачалася для СВК “Хвінявічы” з пашырэння: да нас далучылі СВК “Рудаяварскі”, гаспадарку, якая была на адным з апошніх месцаў у раёне. Аднак гаспадарка мела каля 1000 трусоў і 70 авечак. Мы выкарысталі гэты патэнцыял і накіравалі ўсе наяўныя сілы і сродкі для яго развіцця. Правялі рэканструкцыю ўсіх памяшканняў фермы “Руда Яварская”, пачалі дабудоўваць шэды для трусоў, бо прадукцыя трусагадоўлі карысталася і дагэтуль карыстаецца вялікім попытам, развівалі авечкагадоўлю, актыўна шукалі рынкі збыту сельгаспрадукцыі.
У сувязі з тым, што наша гаспадарка займалася развядзеннем авечак, нас уключылі ў рэспубліканскую праграму развіцця авечкагадоўлі. У мінулым годзе было выдзелена 5,4 мільярда рублёў на закупку імпартных авечак. Я сама ездзіла ў Галандыю, каб адабраць для сельгаскааператыву “Хвінявічы” 400 авечак пароды “тэксель” (20 бараноў і 380 ярачак), цяпер вядзём з імі работу. Сёння пагалоўе авечак у гаспадарцы складае 2150 жывёлін, трусоў – 2330 галоў, буйной рагатай жывёлы – больш за 4000.
За мінулую пяцігодку ў СВК “Хвінявічы” быў пабудаваны малочнатаварны комплекс на 777 кароваў ля вёскі Парэчча, у пачатку 2014 года ён пачаў працаваць. Дзякуючы высокім надоям і вытворчасці малака высокай якасці, рэнтабельнасць гэтай прадукцыі ў апошнія гады склала 44,6%. За 4 месяцы 2016 года на комплексе ў Парэччы атрымана 94,4% малака гатунку “Экстра” з рэнтабельнасцю 42%.
Немагчыма казаць пра станоўчыя вынікі работы сельгаспрадпрыемства і не згадаць яго калектыў. Працаўнікі СВК “Хвінявічы” – прызёры і пераможцы многіх працоўных спаборніцтваў. Аператары машыннага даення СВК “Хвінявічы” летась сталі лепшымі ў вобласці ў спаборніцтве за павелічэнне вытворчасці валавой прадукцыі малака, комплекс і сёння сярод лідараў у раёне. Наш механізатар Анатоль Яўгенавіч Марук узнагароджаны званнем чалавек года, а загадчыца рудаяварскага вытворчага ўчастка Святлана Дзмітрыеўна Скрундзь – жанчына года. Імя брыгадзіра вытворчай брыгады фермы “Руда Яварская” Яўгеніі Мікалаеўны Урбановіч сёлета занесена на раённую Дошку гонару. Нярэдка нашы аграрыі прадстаўляюць раён на абласных “Дажынках”.
Перспектывы СВК “Хвінявічы” звязаны з жывёлагадоўляй. Наша гаспадарка – племянная: мы будзем вырошчваць маладняк і рэалізоўваць у таварныя гаспадаркі Гродзенскай вобласці. У сёлетніх планах гаспадаркі – рэканструкцыя жывёлагадоўчых памяшканняў, пабудова новых дадатковых шэдаў для трусоў: плануем павялічыць іх пагалоўе да 3000, бо гэта перспектыўна. Таксама будзем развіваць авечкагадоўлю. Аднак асноўны акцэнт, як і раней, будзе зроблены на вытворчасць малака, як самай запатрабаванай і рэнтабельнай на сёння сельгаспрадукцыі.
Далейшы лёс сельскай гаспадаркі – непазбежнае пытанне для абмеркавання на форуме. Патрэбны рэформы, перагляд цэнавай палітыкі, пэўныя меры, якія паспрыяюць павышэнню канкурэнтаздольнасці сельгаспрадукцыі, дапамогуць не проста выжываць, а эфектыўна працаваць сельгаспрадпрыемствам у сённяшні няпросты час.
Падрыхтавала да друку Н. СТУПЧЫК
Фота Н. АВЯРЧУК