У рамках акцыі менавіта пад такой назвай прадстаўнікі Дзятлаўскіх ЦРБ і райЦГЭ Мікалай Дзядовіч, Алена Шайбак і Алена Куцко працягваюць наведваць арганізацыі раёна.
На гэты раз яны наведалі працоўныя калектывы Дварэцкага льнозавода і мясцовай сярэдняй школы, каб расказаць, як праходзіць працэс вакцынацыі, каму патрэбна прышчапляцца ў першую чаргу і як запісацца на прышчэпку:
‒ Імунізацыя асабліва неабходна людзям, якія знаходзяцца ў зоне рызыкі: маюць хранічныя захворванні бронха-лёгачнай і сардэчна-сасудзістай сістэмаў, часта кантактуюць з людзьмі.
Прышчэпку можна зрабіць у Дзятлаўскай паліклініцы пасля папярэдняга запісу і агляду ўчастковага тэрапеўта. Працэс праходзіць у два этапы, паміж першай і другой вакцынай павінна прайсці 3-4 тыдні. Гэта трэба для фарміравання ўстойлівага імунітэту. Запісвацца трэба толькі на першую вакцынацыю, на другую вас запішуць аўтаматычна.
Як і пасля любой прышчэпкі, пасля вакцыны “Спутнік V” магчыма з’яўленне пабочных эфектаў: уздым тэмпературы цела, дрыжыкі, галаўны боль, прыпухласць у месцы ін’екцыі. Гэта нармальна, сімптомы пройдуць праз некалькі дзён і сведчаць аб фарміраванні ўстойлівага імунітэту.
Прагнозны імунітэт, па наяўных у цяперашні час даных, складае не менш за год. Важна ведаць, што вакцынацыя не ўратуе ад пападання віруса ў арганізм, але ў выпадку заражэння зробленая своечасова прышчэпка не дасць хваробе развіцца. Акрамя таго, толькі вакцынацыя не менш за 70 % насельніцтва дазволіць стварыць калектыўны імунітэт і перамагчы пандэмію.
Марыя ПАПОВА
