У чарговы раз Дзятлаўшчына сардэчна сустракала замежных гасцей. Муж і жонка Фіш Рэнэ і Брук Жуэль Сафі прыехалі з Люксембурга, каб аказаць гуманітарную дапамогу дзяржаўным установам раёна.
Так, матэрыяльна-тэхнічная база Цэнтра сацыяльнага абслугоўвання насельніцтва папоўнілася двума камп’ютарамі, веласіпедамі для сацыяльных работнікаў, тэлевізарам і саўндбарам для маладых інвалідаў, мэбляй, настольнымі лямпамі, тэлефонам.
Дырэктар Цэнтра сацыяльнага абслугоўвання насельніцтва Таццяна Нікіпорчык нагадала, што сямейная пара люксембуржцаў у 2016 годзе аказала Цэнтру дабрачынную дапамогу ў стварэнні пакоя для прыёму ежы.
З’яўленне гэтага пакоя, які абсталяваны кухонным гарнітурам, мэбляй і неабходнай бытавой тэхнікай, дазволіла тым, хто знаходзіцца ў Цэнтры, арганізоўваць правільнае харчаванне, салодкія сталы да святаў і культурна-масавых мерапрыемстваў.
Не забыліся сябры з Люксембурга і пра аддзяленне кругласутачнага знаходжання для грамадзян пажылога ўзросту ў Казлоўшчыне.
Для добраўпарадкавання аддзялення набыты і перададзены камплекты гардзін на вокны, пакрывалы на ложкі.
Таццяна Сямёнаўна і маладыя інваліды Цэнтра сацабслугоўвання выказалі шчырую падзяку Жуэль і Рэнэ за шчодрыя падарункі.
Юлія БАКУНОВІЧ
