22 чэрвеня ў Беларусі адзначаецца сумная дата – Дзень усенароднай памяці ахвяраў Вялікай Айчыннай вайны.
З гэтым днём звязана трагічная падзея, якая пацягнула за сабой велізарную колькасць смерцяў.
Тэрыторыя Дзятлаўскага раёна была акупавана фашысцкай Германіяй з чэрвеня 1941 па ліпень 1944 гадоў. Лёс Хатыні спасцігла 6 вёсак: Вялікую Волю, Мястэчкі, Дуброўцы, Трахiмовiчы, Чарлёнка, Дубароўшчына.
На тэрыторыі раёна дзейнічалі партызанская брыгада, антыфашысцкі камітэт, партызанскі шпіталь. Дзятлаўчане па праву ганарацца імем Язэпа Юр’евіча Філідовіча, які паўтарыў подзвіг Івана Сусаніна.
9 ліпеня 1944 г. п. Дзятлава быў вызвалены воінамі 283-й стралковай дывізіі пад камандаваннем генерал-маёра Канавалава.
Назаўсёды засталіся ў Дзятлаўскай зямлі воіны-вызваліцелі – Героі Савецкага Саюза: генерал-маёр Ян Янавіч Фогель, палкоўнік Павел Гаўрылавіч Пятроў, старшы сяржант Іван Сямёнавіч Фурсенка, афіцэры, байцы і партызаны, пахаваныя ў брацкіх магілах.
Памяць дзятлаўчан пра воінаў і мірных жыхароў, якія загінулі ў гады Вялікай Айчыннай вайны, увекавечана ў помніках і абелісках.
Вялікая Айчынная вайна – гэта небывалая ў гісторыі па сваіх маштабах і жорсткасці бітва савецкага народа супраць нямецка-фашысцкіх захопнікаў. У гэтай вайне Беларусь страціла кожнага трэцяга жыхара – памяць аб іх будзе жыць вечна.
Як сімвал удзячнасці і падзякі ў гэты дзень ля месцаў воінскіх пахаванняў запальваюцца свечкі, лампады.
Раённы Савет дэпутатаў
Раённы выканаўчы камітэт
