Міжнароднае грамадскае аб’яднанне “Голас сэрца” пры фінансавай падтрымцы Фонду дэмакратыі Арганізацыі Аб’яднаных Нацый рэалізоўвае ў Рэспубліцы Беларусь праект міжнароднай тэхнічнай дапамогі “Беларусь на шляху дэінстытуалізацыі. Стварэнне адукацыйнай прасторы для людзей 18+ з інтэлектуальнымі захворваннямі”.
Праект скіраваны на стварэнне ў нашай краіне сацыяльнага механізму, які дазволіць людзям з інтэлектуальнымі захворваннямі падрыхтавацца да самастойнага жыцця ў грамадстве. Безумоўна, працэс сацыялізацыі такіх пацыентаў даволі складаны, але першыя крокі на гэтым шляху ўжо зроблены.
У 2016/2017 навучальным годзе ў нашай краіне на базе 47 спецыялізаваных інтэрнатных установаў для дарослых людзей з інтэлектуальнымі захворваннямі былі створаны Цэнтры навучання і развіцця. Адзін з іх быў адкрыты ў Казлоўшчынскім псіханеўралагічным доме-інтэрнаце для састарэлых і інвалідаў. А дакладней кажучы, тут быў сфарміраваны клас з 10 навучэнцаў, якія пачалі асвойваць новую праграму.
Больш падрабязна пра гэта расказала настаўніца Цэнтра навучання і развіцця, інструктар па працоўнай тэрапіі Аксана Мікалаеўна Баравік.
— У рамках рэалізацыі праекта, які нам прапанавала МГА “Голас сэрца”, дактары псіхіятры-нарколагі нашай установы падабралі з ліку пацыентаў 10 чалавек, здольных засвоіць курс. Для кожнага з іх была сфарміравана індывідуальная праграма рэабілітацыі, скіраваная на сацыялізацыю і аднаўленне дзеяздольнасці.
Нас забяспечылі камп’ютарнай тэхнікай, мэбляй, праграмнымі і метадычнымі матэрыяламі, канцылярскімі таварамі, адным словам, — усім неабходным для навучання дарослых з інтэлектуальнымі захворваннямі.
Каб упэўніцца, што ўсё падрыхтавана да пачатку навучальнага года, наш дом-інтэрнат наведала старшыня праўлення МГА “Голас сэрца” Святлана Канстанцінаўна Блай.
З 1 верасня пачаліся заняткі. Кожны дзень у нас былі па два ўрокі, якія доўжыліся 35 хвілін. Займаліся па вучэбна-метадычных комплексах у пяці накірунках: “Азбука для дарослых”, “Практычная матэматыка”, “Самастойнасць у быце”, “Чалавек і свет”, “Эмоцыі. Сітуацыйныя паводзіны”, дадаткова засвойвалі курсы “Арганізацыя працоўнай дзейнасці для дарослых 18+, якія жывуць у псіханеўралагічных дамах-інтэрнатах” і “Даведайся пра свае правы” (курс прававой адукаванасці для дарослых з інтэлектуальнымі парушэннямі).
На працягу года мае вучні вучыліся гатаваць ежу, прыбіраць у памяшканнях, плаціць за камунальныя паслугі, засвоілі правілы асабістай гігіены, даведаліся, куды трэба звяртацца, калі спатрэбіцца дапамога, азнаёміліся з правамі інвалідаў.
Навучальны год скончыўся, і вучні ўжо здалі экзамены па засвоеным матэрыяле. Гэта значыць, што першы крок на шляху іх сацыялізацыі ў грамадства зроблены. Яны атрымалі веды, якія набліжаюць іх да магчымасці калі-небудзь жыць самастойна.
Гутарыла І. СТЫРНІК
