Беларусь узяла курс на развіццё высокіх тэхналогій ва ўсіх сферах жыцця. Гэта пацвярджае нядаўна падпісаны Прэзідэнтам указ № 135 аб прыярытэтных напрамках навуковай, навукова-тэхнічнай і інавацыйнай дзейнасці на 2026-2030 гады.
Дзе нашай краіне браць таленавітых інжынераў, праграмістаў і тэхнікаў? Вядома ж, расціць са школы.
Як гэта можна зрабіць, даведаліся ў педагога Віталя Халюкова, кіраўніка гуртка “Кібертэрыторыя”, які функцыянуе на базе Дварэцкай сярэдняй школы і арганізаваны Дзятлаўскім раённым цэнтрам дадатковай адукацыі дзяцей і моладзі.
– Віталь Уладзіміравіч, год таму “раёнка” пісала аб перамозе гурткоўцаў у абласным этапе рэспубліканскага турніру па робататэхніцы. За гэты час у “Кібертэрыторыі” з’явілася яшчэ больш нагодаў для гонару.
– Сапраўды, сёлета мы папоўнілі скарбонку ўзнагарод і асвоілі новы напрамак у рабоце. Літаральна за два месяцы гэтага года прайшлі тры буйныя абласныя спаборніцтвы, як вынік, у нас плюс чатыры дыпломы. На абласны этап рэспубліканскага турніру па робататэхніцы-2025 мы “выставілі” адразу тры каманды, і з пяці магчымых конкурсных дыпломаў намінацыі “ЕV3-лінія”, нягледзячы на сур’ёзную канкурэнцыю з гарадскімі ўстановамі, заваявалі два прызавыя. Дыпломам за другое месца адзначаны Мацвей Сямашка і Аляксандр Кучынскі. Уладальнікамі дыплома трэцяй ступені сталі Аляксандр Жукоўскі і Мацвей Маркевіч. Трэці робат аказаўся вельмі аб’ёмным і “сышоў” з дыстанцыі на паваротах, але ўсе ўдзельнікі іспытаў засталіся задаволеныя, паколькі, акрамя ўзнагарод, атрымалі яшчэ і каштоўны вопыт, які дапаможа дабівацца поспехаў у далейшым.
Наступным выніковым для нас быў абласны этап рэспубліканскага ІТ-чэмпіянату “РобІн-2025”. Шасцікласнік Кірыл Кашко, які першы год наведвае “Кібертэрыторыю”,стаў уладальнікам дыплома трэцяй ступені. Вынік вельмі значны, бо па ўмовах іспытаў да намінацыі “Праходжанне па лініі” дапускаліся і робаты, вырабленыя на іншых платформах, больш сучасных, чым наш “Лега- ЕV3”.
Больш за месяц заставалася на падрыхтоўку да асноўнага рэспубліканскага турніру па робататэхніцы, дзе на абласным этапе зрабілі стаўку не на колькасць удзельнікаў, а на якасць. Гурткоўцы “Кібертэрыторыі” выступілі ў дзвюх намінацыях: “Лінія” і “Інтэлектуальнае сумо 15х15”. Сабралі робата-сумаіста. Напрамак новы, таму адначасова вучыліся, як над ім працаваць. Для сваёй мадэлі з іншага камплекта дазаказалі маленькія колы, каб “упісацца” ў габарыты, змайстравалі спарынг-партнёра для трэніровак. Удзельнікаў сярод “сумаістаў”, дзе выступаў Павел Дашкевіч, было адзінаццаць, спаборніцтвы ладзіліся па кругавой сістэме. Наша мадэль выйграла некалькі паядынкаў і стала “бронзавым” лідарам, а мы атрымалі абсалютна новы вопыт канструктарскіх рашэнняў.
– Колькі ўсяго дварэцкіх школьнікаў асвойвае азы робататэхнікі?
– Цяпер аб’яднанне па інтарэсах “Кібертэрыторыя” наведваюць 12 навучэнцаў 6-9 класаў. Дзеці вельмі зацікаўлены напрамкам, а пасля спаборніцтваў азарту дадалося: хлопчыкі выкарыстоўвалі любую магчымасць, каб застаць мяне ў школе і патрэніравацца дадаткова.
Канструяванне робататэхнікі я асвоіў самастойна, бо даўно меў да гэтага цікавасць. Цяпер перадаю веды навучэнцам, заадно “адточваю” свае як у час заняткаў з гурткоўцамі, так і на турнірах. Спыняцца ў гэтым працэсе нельга, бо аматарам канкурыраваць з вузкімі гарадскімі спецыялістамі, у якіх ёсць магчымасць пастаянна павышаць кваліфікацыю, заўсёды складана, але вынікаў мы дабіваемся. Мяркую, дзякуючы майму захапленню, дзеці з аграгарадка атрымалі цудоўную магчымасць развіваць інжынерныя навыкі, спадзяюся, гэта стане для іх выдатным бонусам у далейшым жыцці. У цэлым жа, лічу, што ў прагрэса, які сапраўды павінен пачынацца са школы, два асноўныя складальнікі: сучасная тэхніка і дасведчаныя спецыялісты.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#Дятловщина #нашалепшае #нашелучшее #образование
