У Беларусі за мінулы тыдзень адбылося 102 лясныя пажары

За мінулы тыдзень (з 3 па 9 жніўня) у Беларусі адбылося 102 лясныя пажары на агульнай плошчы 101 га. Аб гэтым паведаміў карэспандэнту БЕЛТА намеснік начальніка ўпраўлення лясной гаспадаркі Мінлясгаса Дзмітрый Красоўскі.

У прыватнасці, 26 пажараў зарэгістравана ў лясным фондзе Брэсцкай вобласці на агульнай плошчы 26 га. У Гомельскай вобласц адбылося 23 лясныя пажары на плошчы 39,23 га, у Мінскай — 20 (5,21 га), у Магілёўскай — 16 (12,97 га), у Віцебскай — 10 (каля 16,2 га), у Гродзенскай вобласці — 7 выпадкаў (1,73 га).

Усяго з пачатку пажаранебяспечнага перыяду ў рэспубліцы адбылося 672 лясныя пажары на агульнай плошчы 5 тыс. 71 га. Для параўнання, у 2014 годзе гэта лічба была ў два разы меншая — 374 выпадкі. Пры гэтым плошча пажараў была ўсяго 162 га. Гэта перш за ўсё звязана з умовамі надвор’я, якія ў бягучым і мінулым годзе радыкальна адрозніваюцца, растлумачыў Дзмітрый Красоўскі.

Спецыяліст адзначыў, што з улікам цяперашняй сітуацыі Міністэрства лясной гаспадаркі прымае ўсе меры для таго, каб не дапусціць выпадкаў узгарання ў лясным фондзе. «На сёння ўведзена забарона на наведванне лясоў грамадзянамі па ўсёй рэспубліцы. Вядзецца ўзмоцненае патруляванне, дзяжурства дзяржаўнай лясной аховы пераведзена на кругласутачны рэжым. На з’ездах з дарог арганізавана 282 пасты, у месцах масавага наведвання насельніцтвам — 165. Акрамя таго, у СМІ актыўна размяшчаецца інфармацыя аб правілах паводзін грамадзян у лясах і каля лясоў у час пажаранебяспечнага перыяду, а таксама ў час дзеяння забароны на наведванне лясоў», — дадаў Дзмітрый Красоўскі.

Толькі за перыяд з 13 ліпеня па 8 жніўня сіламі Міністэрства лясной гаспадаркі, ВЛГА праведзены 1691 рэйд, у тым ліку сумесных з іншымі органамі — 293. У выніку складзена 122 пратаколы, вынесена 185 пастаноў.

Асноўнай прычынай лясных пажараў, паводле слоў намесніка начальніка ўпраўлення лясной гаспадаркі, па-ранейшаму з’яўляецца чалавечы фактар.