Сяргей Каско: “Нацыянальная ідэнтычнасць аб’ядноўвае”

На мінулым тыдні Прэзідэнт Беларусі Аляксандр Лукашэнка пабываў з рабочым візітам у Амане, у тым ліку наведаў Нацыянальны музей, які падпарадкоўваецца Султану Амана і з’яўляецца стратэгічнай установай, займаецца пытаннямі нацыянальнай ідэнтычнасці.

Беларускі лідар падкрэсліў, што гэта і для нас важна. Увогуле, Аляксандр Рыгоравіч, характарызуючы Аман як краіну-партнёра для доўгатэрміновых эканамічных і стратэгічных узаемаадносінаў, адзначыў, што ў нас няма глыбінных рознагалоссяў. Наадварот, Беларусь і Аман маюць падобныя погляды па многіх актуальных пытаннях сусветнага парадку. Воляю лёсаў аказаліся на шляхах рассялення людзей у Еўразіі і Афрыцы, скрыжаваннях гандлёвых шляхоў і скрыжаванні цывілізацый.

Сваімі думкамі наконт важнасці захавання нацыянальнай ідэнтычнасці і пры гэтым наладжвання міжнародных сувязяў падзяліўся дырэктар Дзятлаўскага гісторыка-краязнаўчага музея Сяргей Каско:

– Пытанні нацыянальнай ідэнтычнасці, як момант унутранай палітыкі, адсочвае любая дзяржава, паколькі мова, традыцыі, гістарычная спадчына – гэта тое, што аб’ядноўвае народ па агульных культурных і іншых асаблівасцях.

Мяркую, кожны з нас разумее, што мы, беларусы, – народ з легендарным гераічным і гістарычным мінулым і дастойнай сучаснасцю. Нам ёсць што берагчы, чым ганарыцца і што захоўваць. У нашым музеі мы пастаянна стараемся данесці гэта да падрастаючага пакалення, каб і яно расло вартым сваіх легендарных продкаў, якія адстаялі і захавалі краіну, не шкадуючы жыцця, станавіліся на яе абарону.

Калі праводзіць паралелі з Аманам, то тое, на што варта звяртаць увагу, – гэта любоў да роднай беларускай мовы, якая павінна гучаць не толькі на ўроках, але і ў сем’ях, у размовах людзей як мага часцей. Зразумела, што наша Беларусь знаходзіцца на скрыжаваннях геаграфічных і гандлёвых шляхоў, з-за міграцыйных і гістарычных працэсаў так склалася, што наш народ часцей выкарыстоўвае рускую мову. Яна таксама павінна ўжывацца як мова культурнага дыялогу, як сродак зносінаў з братнімі народамі, з якімі прайшлі працяглы сумесны шлях, ёсць цесныя ўзаемаадносіны, сяброўства. Выдатна, што ў нас двухмоўе, але і сваю “матчыну” мову мы павінны захоўваць і цаніць, каб не стаць “Іванамі няпомнячымі”. Менавіта праз уласныя мову, культуру і традыцыі кожны народ імкнецца да развіцця, самадасканаласці, і гэтымі асаблівацямі ён цікавы для іншых культур і народаў.

Калі казаць пра падабенства поглядаў на сусветны парадак, то Беларусі пашанцавала менш, чым Аману: у нас мала карысных выкапняў. Аднак ад савецкага мінулага дасталася багатая спадчына, якую мы змаглі развіць і памножыць, таму цяпер як эканамічныя партнёры можам прапаноўваць іншым дзяржавам супрацоўніцтва і падтрымку па многіх пазіцыях. Беларусь здольна, з улікам гістарычных і геаграфічных фактараў, прапаноўваць свае тавары, зрабіць пазнавальнымі свае брэнды, і ў гэтым нам дапамагаюць саюзнікі і гандлёвыя партнёры на міжнароднай арэне. Такія краіны, як Аман – гэта надзейныя пляцоўкі для развіцця далейшага супрацоўніцтва і экспартных паставак у цэлым рэгіёне, нездарма абмяркоўвалася стварэнне гандлёвага хаба. Шматпалярнасць і суверэнітэт – актуальныя напрамкі ўзаемадзеяння, якія ў наш нестабільны час паспрыяюць захаванню міру і міжнароднага супрацоўніцтва.

Ірына СТЫРНІК        

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее
#нашалепшае