У нядзелю, 29 мая, у аграгарадку Дварэц праходзіла раённае свята лёну.
Праводзілася свята на школьным стадыёне, дзе ўстановы і арганізацыі зладзілі свае падворкі. На ўваходзе першыя сустракалі гасцей прадстаўнікі Дварэцкага льнозавода, якія паказалі сваю прадукцыю і наладзілі продаж вырабаў Аршанскага льнокамбіната. Далей – падворак экспартна-сартавальнай базы, дзе можна было набыць льняны алей і даведацца пра яго ўласцівасці. Сувенірную прадукцыю прапаноўвалі Дзятлаўскі гісторыка-краязнаўчы музей, народныя умельцы. Культработнікі з Казлоўшчыны і Хвінявічаў запрашалі на дэгустацыю страваў, дзе выкарыстоўвалі льняны алей і муку. Раготнаўская школа паклікала на міні-экскурсію па музеі лёну пад адкрытым небам. А майстар-клас правяла Ніна Іосіфаўна Антончык.
Падчас тэатралізаванага прадстаўлення “Пасееш лён, пажнеш золата” прысутныя даведаліся шмат адметнага пра лён. Шмат песень прагучала са сцэны пра наш беларускі лянок. Глядачоў весялілі не толькі дзятлаўскія артысты, сярод якіх калектывы “Ятранка”, “Прымакі”, але і прыезныя – вакалісты-міліцыянеры Упраўлення ўнутраных справаў Гродзенскага аблвыканкама, а таксама ансамбль песні “Васільковая раніца” са Шчучынскага раёна.
Асабліва шматлюдна было на пляцоўцы, дзе праводзілася “Сельская вясёлая эстафета”. Усе конкурсы тычыліся лёну: лён любіць вадзіцу, спляці касу, матальшчыкі, ільняны снайпер, зрабі ляльку. У камандным заліку з 65 баламі перамог СВК “Хвінявічы”. 62 балы набралі гаспадары пляцоўкі, за якіх хварэлі і старыя, і малыя, СВК “Дварэц-Агра” і занялі другое месца. Бронзавым прызёрам стаў СВК “Слава працы” (61 бал).
Па водгуках гасцей, свята спадабалася. Людзі, асабліва сталага веку, выказвалі пажаданні, каб да іх часцей прыязджалі артысты, тады ў вёсцы жыць весялей. Маладыя мамы былі задволены магчымасцю пакатаць малых на машынках, пусціць іх паскакаць на батуце, паўдзельнічаць у конкурсах, якія праводзілі Мальвіна і Бураціна.
А наперадзе ў вяскоўцаў – новая сустрэча. У чэрвені гасцей будзе прымаць Вензавец, дзе адбудзецца свята касцоў.
І. ІВАНАВА
Фота Б. ВАРНЫ
