Спроба пяра. Навагодняя паштоўка-2026

Напярэдадні зімовых святаў у гімназіі № 1 горада Дзятлава прайшоў творчы конкурс на лепшую навагоднюю паштоўку. Кожная работа, прадстаўленая ўдзельнікамі, стала сапраўдным падарункам – яркім, добрым і непаўторным, напоўненым духам чараўніцтва і радасці.

Усе паштоўкі былі размешчаны ў холе гімназіі, ператварыўшы яго ў сапраўдную навагоднюю галерэю. Выставу змаглі ўбачыць не толькі вучні і настаўнікі, але і бацькі.

Першае месца было падзелена паміж самымі юнымі ўдзельнікамі – вучнямі 1 і 2 класаў. Іх работы пакарылі журы непасрэднасцю, яркасцю фарбаў і кранальнай шчырасцю.

Другое месца заслужана занялі выпускнікі – навучэнцы 11 класа. Іх паштоўкі адрозніваліся глыбокай сэнсавай нагрузкай, складанай тэхнікай выканання і філасофскім асэнсаваннем свята як мяжы, якая злучае мінулае і будучыню.

Трэцяе месца прысуджана навучэнцам 7 “Б” класа за арыгінальныя кампазіцыйныя рашэнні і выдатнае валоданне рознымі мастацкімі прыёмамі.

Урачыстае ўзнагароджанне пераможцаў прайшло на традыцыйнай пераднавагодняй лінейцы. Дыпломы і памятныя падарункі ўручыла дырэктар гімназіі, падзякаваўшы кожнаму ўдзельніку за творчасць, працу і падораную святочную атмасферу.

Конкурс “Навагодняя паштоўка-2026” зноў паказаў, што гімназія – гэта не толькі месца атрымання ведаў, але і прастора, дзе раскрываюцца таленты, пануе дух стварэння і сяброўства. Паштоўкі падарылі атмасферу свята і паказалі, што навагодні цуд жыве ў кожным з нас.

Дар’я БУРДУН,
навучэнка 10 класа, удзельніца прэс-цэнтра гімназіі “Лічбавае медыя+”

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga