Школьны мерыдыян

Дзеці – пра самых любімых

Выхаванцы Казлоўшчынскага дзіцячага сада сталі актыўнымі ўдзельнікамі дыстанцыйнай рэспубліканскай акцыі “Беларуская жанчына вачыма дзяцей”. Праз малюнкі яны паспрабавалі адказаць на пытанне, якой яны бачаць сучасную жанчыну, і выказаць сваю любоў самым блізкім людзям. У сваіх работах яны стараліся перадаць цеплыню і пяшчоту, якія асацыіруюцца ў іх з вобразам маці. Праз прызму дзіцячага светапогляду беларуская жанчына паўстала шматграннай: пяшчотнай, працавітай, мудрай, прыгожай. Малюнкі, выкананыя фарбамі, алоўкамі і фламастарамі, атрымаліся яркімі і вельмі эмацыянальнымі. На многіх з іх можна ўбачыць не проста партрэт, а цэлы сюжэт. Яны размешчаны на Нацыянальным адукацыйным партале.

“Школа без агрэсіі”

Такая сцяна з’явілася ў Казлоўшчынскай сярэдняй школе. У рамках гэтай ініцыятывы акцэнт зроблены на фарміраванне ў вучняў даверу, прыязнасці, узаемадапамогі і павагі адзін да аднаго. Навучэнцы мацавалі на сцяну прыказкі, прымаўкі, цытаты аб каштоўнасці сяброўства.

Гадзіна здароўя і права

У 11 класе гімназіі № 1 горада Дзятлава ў рамках Міждзяржаўнай акцыі “Тыдзень здароўя і правоў чалавека ў Садружнасці Незалежных Дзяржаў” прайшоў адкрыты ўрок “Гадзіна здароўя і права” з запрашэннем медыцынскай сястры Дзятлаўскай цэнтральнай раённай бальніцы. У ходзе ўрока навучэнцам былі прапанаваны практычныя сітуацыі, накіраваныя на фарміраванне прававой граматнасці і культуры ў сферы аховы здароўя, абмеркаваны механізм атрымання бясплатнай медыцынскай дапамогі ў нашай краіне, акцэнтавана ўвага на нумарах экстранных службаў і алгарытме званка.

Падзарадка энергіяй руху

Да Міжнароднага дня здароўя ў дзіцячым садзе № 2 райцэнтра было арганізавана пазнавальнае мерапрыемства для выхаванцаў сярэдніх і старэйшых груп, на якім прысутнічала старшыня Дзятлаўскай раённай арганізацыі Беларускага Таварыства Чырвонага Крыжа Галіна Касцюк. Яна расказала, што гэтатаварыства дапамагае шматдзетным сем’ям, дзецям з абмежаванымі магчымасцямі, цяжкахворым і заклікала ўсіх берагчы і ўмацоўваць сваё здароўе.

Разам з касмічным робатам Здаравячком з планеты Здароўя ўспомнілі навыкі здаровага ладу жыцця, прыказкі, адгадвалі загадкі, змагаліся з вірусамі, выконвалі спартыўныя заданні.

Прыемным сюрпрызам для хлопчыкаў і дзяўчынак сталі падарункі ад Чырвонага Крыжа.

Падрыхтавала Таццяна САНЮК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga