Дзень абаронцаў Айчыны – нагода для дашкольнікаў, а таксама вучняў пачатковых класаў павіншаваць сваіх татаў і дзядуляў асаблівымі падарункамі.
Так у кожнай з груп дашкольнага цэнтра развіцця дзіцяці № 2 горада Дзятлава выхаванцы майструюць сваімі рукамі памятныя паштоўкі з самымі шчырымі пажаданнямі.
Разам з карэспандэнтамі раёнкі дзеці паразважалі, хто такія сапраўдныя абаронцы і як іх трэба віншаваць.
– Абаронца Айчыны – гэта тата. Ён абараняе сваю сям’ю, ходзіць на працу, зарабляе грошы, каб купіць прадукты, дапамагае маме дома, – тлумачыць Давід Цярэшка з групы № 10.
– Тата нам з мамай нічога не падарыў на Новы год, толькі Дзед Мароз, але мы ўсё адно яго павіншуем са святам. Падорым яму паштоўку з караблікам і кашулю. А яшчэ я прачытаю верш у падарунак, – раскрывае сакрэт Жэнечка Кузьміч з 11-й групы.
– Абаронца – гэта той, хто носіць зброю і ўмее страляць. Але ён не страляе, ён абараняе людзей і сваю Радзіму. Абаронцы апранаюць форму, служаць у лесе або ў арміі, яны могуць таксама працаваць у міліцыі і нават у хуткай дапамозе, – кажа Яўген Гушча з групы № 11.
Наталля АВЯРЧУК
Фота Вольгі ЮШКЕВІЧ
