На базе Дзятлаўскага раёна адбылося выязное пасяджэнне Гродзенскай абласной арганізацыі Беларускага прафесійнага саюза работнікаў адукацыі і навукі, абласнога савета ветэранаў працы галіны, старшыняў райкамаў, гаркамаў. Госці даведаліся аб рабоце Дзятлаўскага раённага камітэта прафсаюза і раённага савета ветэранаў працы галіны.
У фае і актавай зале сярэдняй школы №1 горада Дзятлава для ўдзельнікаў сустрэчы была арганізавана выстава матэрыялаў з вопыту работы пярвічных прафсаюзных арганізацый з ветэранамі галіны і сценгазет з віншаваннямі для педагогаў-юбіляраў гэтага года, а таксама выстава творчасці ветэранаў педагагічнай працы.
Пасяджэнне адкрыла старшыня абласной арганізацыі Беларускага прафесійнага саюза работнікаў адукацыі і навукі В. В. Грышэчка, якая азнаёміла прысутных з павесткай дня і пажадала плённай працы.
Гасцей павітаў намеснік старшыні Дзятлаўскага райвыканкама І. С. Кухарэвіч. Ён расказаў, як развіваўся раён у апошнія гады, што новага тут з’явілася. Ігар Станіслававіч зазначыў, што на Дзятлаўшчыне вялікая ўвага надаецца развіццю сацыяльнай сферы, асабліва ахове здароўя і адукацыі. Сярод дасягненняў педагогаў раёна і іх выхаванцаў — удзел і прызавыя месцы ў абласных, рэспубліканскіх, міжнародных выставах, канферэнцыях, алімпіядах, творчых крнкурсах. Ганарыцца раён і ветэранамі педагагічнай працы, многія з якіх займаюць актыўную жыццёвую пазіцыю і з задавальненнем дзеляцца прафесійным вопытам з маладымі калегамі.
Начальнік аддзела кадравай работы ўпраўлення адукацыі Гродзенскага аблвыканкама Т. Б. Зайко расказала, што на Гродзеншчыне жыве каля 14 тысяч ветэранаў педагагічнай працы, трэцяя частка з якіх прадаўжае працаваць. Многія гэтыя людзі — заслужаныя работнікі, выдатнікі адукацыі, якія шмат гадоў аддалі навучанню і выхаванню дзяцей. Моладзі сёння важна пераймаць у іх вопыт, не менш важна не абыходзіць увагай тых, хто ўжо знаходзіцца на заслужаным адпачынку, каб яны адчувалі сябе па-ранейшаму запатрабаванымі.
З гэтай думкай поўнасцю згодны старшыня Гродзенскага абласнога савета ветэранаў педагагічнай працы У. А. Гаўрон. Уладзімір Антонавіч расказаў, як абласны савет ветэранаў супрацоўнічае з Беларускім прафсаюзам работнікаў адукацыі і навукі па актывізацыі дзейнасці пярвічных ветэранскіх арганізацый. На яго думку, самае галоўнае ў рабоце з ветэранамі працы — не быць раўнадушным да справы, якой займаешся. На Дзятлаўшчыне, дарэчы, нераўнадушных актывістаў шмат — Р. А. Ганчарэвіч, Я. Р. Савань, Т. У. Крывеня, Г. С. Урбановіч, В. І. Русіна, Т. М. Красюк. Работу верэранскіх арганізацый нельга разглядаць асобна ад работы прафсаюза, які аказвае ў тым ліку і фінансавую падтрымку для арганізацыі сустрэчаў, экскурсій, мерапрыемстваў.
Узгадаў Уладзімір Антонавіч і гады сваёй работы загадчыкам Дзятлаўскага раённага аддзела адукацыі, назваў імёны ветэранаў працы, якія ўнеслі значны ўклад у развіццё сістэмы адукацыі Дзятлаўшчыны, — М. М. Няволіну, Р. А. Ганчарэвіч, Н. Р. Буйко, Л. В. Саванец, Н. В. Вілісаву, Н. Р. Мілейка, Н. А. Варабей, Я. А. Кійко, Л. К. Грэйню, А. М. Чурыла.
Старшыня Дзятлаўскай раённай арганізацыі Беларускага прафсаюза работнікаў адукацыі і навукі С. Б. Фабішэўскі падзяліўся з гасцямі вопытам арганізацыі работы з ветэранамі галіны. Ён расказаў, што раённая ветэранская арганізацыя была створана на Дзятлаўшчыне шэсць гадоў таму. За час свайго існавання займела пэўныя традыцыі, важнейшая з якіх — сустрэча ветэранаў галіны напярэдадні прафесійнага свята, віншаванне педагогаў-юбіляраў. А са студзеня 2016 года ў 18 установах адукацыі раёна створаны свае ветэранскія пярвічкі. За кожным ветэранам, які жыве на Дзятлаўшчыне замацаваны шэфы. Станіслаў Баляслававіч упэўнены, што памятаць трэба пра кожнага чалавека, толькі ў гэтым выпадку работа будзе мець станоўчыя вынікі.
Аб тым, што сумесная работа Дзятлаўскага раённага савета ветэранаў педагагічнай працы і галіновага прафсаюза сапраўды дае плён, што ў раёне наладжана дзейнасць пярвічных ветэранскіх арганізацый расказала старшыня Дзятлаўскага раённага савета ветэранаў працы галіны Р. А. Ганчарэвіч. Раіса Аляксандраўна прывяла шмат прыкладаў, як на Дзятлаўшчыне настаўнікаў-пенсіянераў шануюць і паважаюць, расказала аб традыцыйных штогадовых сустрэчах напярэдадні прафесійнага свята, падтрымцы ветэранаў працы ў цяжкіх жыццёвых сітуацыях, шэфстве над імі ўстановаў адукацыі, нефармальных аб’яднаннях па інтарэсах.
Намеснік старшыні Дзятлаўскага раённага савета ветэранаў працы галіны Я. Р. Савань зазначыла, што дэвіз раённай ветэранскай арганізацыі: “Не пакідаць без увагі ніводнага педагога-ветэрана”, таму на кожнага пенсіянера тут заведзены ўліковыя карткі, створаны актуальны банк даных, які пастаянна аднаўляецца. Таксама вядзецца ўлік добрых справаў, настаўнікаў-ветэранаў віншуюць з днямі нараджэння, юбілеямі.
Аб тым, як наладжана работа з ветэранамі працы ў сярэдняй школе №1 горада Дзятлава, расказалі дырэктар установы Н. С. Белавус і старшыня пярвічнай прафсаюзнай арганізацыі Н. Б. Якабчук.
Другая частка сустрэчы прадугледжвала творчыя прэзентацыі аматарскіх аб’яднанняў ветэранаў. Р. У. Лакіза расказала гісторыю стварэння нефармальнага аб’яднання “Поэзия — души движенье”, пачытала свае вершы. Удзельнікі аб’яднання “Песня — душы тварэнне” па-майстэрску выканалі некалькі музычных твораў. Пасля гэтага ўдзельнікі сустрэчы накіраваліся ў аграгарадок Дварэц, дзе пабылі на пасяджэнні міжгаліновага клуба ветэранаў працы “В кругу друзей” (кіраўнік В. І. Скок). У гарадсім пасёлку Наваельня госці наведалі школу, ад дырэктара М. Я. Лашкоўскай, старшыні прафкама В. А. Юшкевіч, старшыні пярвічнай ветэранскай арганізацыі Т. У. Крывеня даведаліся, як тут наладжана работа з ветэранамі працы, а таксама пабылі ў народным музеі “Дзеці ліхалецця”, кіраўніком якога з’яўляецца Т. У. Крывеня. Тамара Уладзіміраўна расказала шмат цікавага пра работу пярвічнай арганізацыі, падзялілася планамі надалей.
І. КАЎКЕЛЬ
Фота П. АДАМЧУКА
