Адбылося чарговае пасяджэнне камісіі па справах непаўналетніх і каардынацыйнага савета райвыканкама па кантролі за выкананнем Дэкрэта № 18, разгледжаны чатыры пытанні.
Задаволена хадайніцтва сацыяльна-педагагічнага цэнтра горада Дзятлава аб адмене рашэння камісіі па прызнанні маючымі патрэбу ў дзяржаўнай абароне трох непаўналетніх дзяцей, якія некалькі месяцаў знаходзіліся ў сацыяльным прытулку ўстановы – яны вярнуліся да матулі. Прынята рашэнне па адміністрацыйнай справе на непаўналетняга дзятлаўчаніна – навучэнца аднаго з дзяржаўных каледжаў вобласці, і разгледжана хадайніцтва гэтага каледжа аб магчымасці адлічэння хлопца з установы.
Каардынацыйным саветам райвыканкама па выніках сацыяльнага расследавання прызнаны ў сацыяльна ненадзейным становішчы трое дзяцей з адной сям’і.
Круты жыццёвы паварот
Праблемы ў сям’і, дзе гадуецца трое непаўналетніх дзяцей, пачаліся дастаткова даўно. Дарослыя доўга не знаходзілі паразумення, часта высвятлялі паміж сабой адносіны, муж быў аматарам алкаголю і нярэдка распускаў кулакі. Перш чым члены камісіі па справах непаўналетніх прынялі рашэнне аб адабранні сына і дзвюх дачок, ненадзейных бацькоў неаднаразова выклікалі на пасяджэнні каардынацыйнага савета, камісіі, праводзілі іншыя прафілактычныя размовы, аднак сямейны недабрабыт, як арэлі, то заціхаў, то зноў даходзіў да “тэмпературы кіпення”. У выніку некалькі месяцаў таму было прынята рашэнне аб прызнанні непаўналетніх маючымі патрэбу ў дзяржаўнай абароне і змяшчэнні ў сацыяльны прытулак. Бацькі вымушана атрымалі час і магчымасць задумацца над сваімі паводзінамі і жыццёвымі прыярытэтамі.
У выніку шлюб яны скасавалі, маці непаўналетніх набыла дом у адной з вёсак раёна, стварыла там неабходныя для дзяцей умовы, працавала, не дапускала прагулаў, па магчымасці наведвала сына і дачок у прытулку. Бацька ж, наадварот, быў накіраваны ў лячэбна-працоўны прафілакторый, дзе знаходзіцца і цяпер.
Пры разглядзе хадайніцтва сацыяльна-педагагічнага цэнтра члены камісіі выслухалі меркаванні педагогаў, прадстаўніка наймальніка, старшыні сельвыканкама. Паколькі галоўныя праблемы сямейнага недабрабыту, з-за якіх непаўналетнія былі адабраны, маці вырашыла, было прынята абгрунтаванае рашэнне: вярнуць ёй дзяцей. Безумоўна, сям’я па-ранейшаму будзе знаходзіцца на пільным кантролі, аднак хочацца спадзявацца, што шанц самастойна гадаваць сына і дачок жанчына не ўпусціць.
Калі не вучыцца, то працаваць
У камісію па справах непаўналетніх райвыканкама паступіла хадайніцтва аднаго з дзяржаўных каледжаў аб магчымасці адлічэння непаўналетняга дзятлаўчаніна з гэтай установы.
Як высветлілася ў час пасяджэння, у каледжы наш малады зямляк займаецца з 2022 года і ў хуткм часе ўжо мог бы стаць атэставаным спецыялістам, але на занятках бывае рэдка. Як сцвярджае адміністрацыя навучальнай установы, пры жаданні ўсё можна было б выправіць, аднак менавіта жадання набываць прафесію ў юнака няма.
На ўсе пытанні, тлумачэнні і прапановы членаў камісіі хлопец цвёрда адказваў адно: “Мне не падабаецца выбраная спецыяльнасць”. Разам з тым, чаго менавіта хоча ад будучыні, якіх перспектываў чакае, малады чалавек не паведаміў.
Спецыялісты папярэдзілі навучэнца, што ўсе вучэбныя дысцыпліны за курс сярэдняй школы, па якіх ён не атэставаны ў каледжы, пры адлічэнні давядзецца вывучыць і здаць экстэрнам. Юнак нават на гэта згодны, каб не прадаўжаць вучобу. Праўда, ёсць і яшчэ адно абавязковае патрабаванне: працаўладкавацца. Калі ў камісію будзе прадастаўлена даведка ад наймальніка – пытанне аб адлічэнні вырашыцца станоўча.
Уся гэта няпростая працэдура заклікана абараніць моладзь ад неабдуманых учынкаў і згубных залежнасцяў. Вось і ў нашага земляка другім пытаннем на камісіі разглядаўся адміністрацыйны пратакол. Яго хлопец “зарабіў” вечарам 2 верасня гэтага года ў родным горадзе (а павінен быў знаходзіцца на вучобе), калі ў стане алкагольнага ап’янення на адной з вуліц быў затрыманы праваахоўнікамі. Паколькі непаўналетні пакуль не мае ўласнага даходу, яго афіцыйна папярэдзілі аб недапушчэнні падобных парушэнняў у далейшым і аб тым, што з ім будзе весціся індывідуальная прафілактычная работа.
З-за парушэння бацькі – недабрабыт сям’і
Члены каардынацыйнага савета райвыканкама разгледзелі вынікі сацыяльнага расследавання, праведзенага ў сям’і, дзе гадуюцца трое дзяцей. Яна і раней па розных прычынах трапляла ў поле зроку службаў прафілактыкі, некаторы час была сацыяльна ненадзейнай, а на гэты раз бацьку за рулём без вадзіцельскага пасведчання затрымала дзяржаўтаінспекцыя. Згодна з патрабаваннямі заканадаўства мужчына заплаціў значны штраф.
На пасяджэнні ён расказаў, што прайшоў курс навучання, а на “правы” здаць яшчэ не паспеў, затое набыў сабе патрыманы аўтамабіль, за рулём якога ехаў у той злашчасны дзень.
На жаль, шматдзетны бацька ў поўнай меры так і не зразумеў, чаму нельга вадзіць машыну без пасведчання, што сваім неабдуманым учынкам ён падвяргаў рызыцы іншых удзельнікаў дарожнага руху. Дарэчы, дзе гарантыя, што пры пэўных абставінах ён не пасадзіў бы ў салон аўто яшчэ і сваіх трох дзяцей, жонку?
З улікам усіх фактараў рызыкі шматдзетная сям’я прызнана ў сацыяльна ненадзейным становішчы і будзе знаходзіцца на больш пільным кантролі.
Святлана ЗАЛУЧАН,
намеснік старшыні камісіі па справах непаўналетніх райвыканкама
Сяргей АЛЯШКЕВІЧ,
намеснік пракурора Дзятлаўскага раёна
Ірына СТЫРНІК,
карэспандэнт газеты “Перамога”, член камісіі
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
