Прастора натхнення і сувязі пакаленняў

Сучасная бібліятэка сёння – гэта не толькі месца, дзе захоўваецца літаратура ці выдаюцца кнігі. Гэта пляцоўка для творчасці, захавання народных традыцый і шчырых чалавечых стасункаў. У гэтым штодня пераконваецца кожны, хто адчыняе дзверы Раклевіцкай сельскай бібліятэкі-клуба. Нядаўна тут прайшоў шэраг мерапрыемстваў, якія падарылі мясцовым жыхарам шмат цёплых эмоцый і карысных адкрыццяў.

Вялікую папулярнасць сярод вяскоўцаў набыў майстар-клас “Ніткі натхнення”, які аб’яднаў сапраўдных аматараў народнага мастацтва. Галоўнай тэмай сустрэчы стала вышыўка сурвэтак складанай двухстаронняй гладдзю. Пад кіраўніцтвам бібліятэкара ўдзельніцы цярпліва асвойвалі тонкасці гэтага старадаўняга майстэрства. Але галоўнай каштоўнасцю мерапрыемства стала сама атмасфера: за карпатлівай працай жанчыны дзяліліся самымі дарагімі ўспамінамі і цікавымі гісторыямі са свайго сямейнага жыцця.

Сапраўдным святам мілагучнасці і настальгіі стаў музычны фуршэт “Гучаць знаёмыя мелодыі”. Госці з вялікай асалодай акунуліся ў музычную атмасферу мінулых гадоў.

Сюрпрызам для ўсіх пакаленняў гасцей была прэзентацыя ўнікальнай экспазіцыі “Эвалюцыя рэчаў”, арганізаванай у межах доўгатэрміновага крэатыўна-пошукавага праекта “Хата продкаў у люстэрку часу”. Галоўнымі экспанатамі выставы сталі старадаўні драўляны рубель (зубчастая дошка для катання бялізны) і яго прамы нашчадак – сучасны электрычны прас. На майстар-класе дзеці і падлеткі змаглі паспрабаваць сябе ў ролі гаспадароў мінулых стагоддзяў. Бібліятэкар наглядна паказала, як з дапамогай драўлянага качалка і рубля зрабіць палатняную бялізну роўнай і гладкай.  

Раклевіцкая бібліятэка-клуб беражліва зберагае карані мінуўшчыны, дорыць радасць сучаснай творчасці і застаецца тым утульным месцам, дзе заўсёды цёпла і цікава ўсёй сям’і.

Таццяна ЦЫГЕЛЬ,
бібліятэкар Раклевіцкай бібліятэкі

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga