У Дзятлаўскім раёне сёлета будуць працаваць 17 дзіцячых аздараўленчых лагераў. Праведзены маніторынгі летнікаў

У Дзятлаўскім раёне сёлета будуць працаваць 17 дзіцячых аздараўленчых лагераў з дзённым знаходжаннем дзяцей на базе ўстановаў адукацыі раёна, 5 лагераў працы і адпачынку з дзённым знаходжаннем і 2 з кругласутачным знаходжаннем дзяцей на базе ўстановаў адукацыі, 6 палатачных лагераў на базе ўстановаў адукацыі і 1 лагер з кругласутачным знаходжаннем на базе аддзялення “Баравічок” філіяла “Санаторый “Радон” ААТ “Белаграздраўніца”.

У канцы красавіка і пачатку мая інспекцыяй нагляду і прафілактыкі праведзены маніторынг месцаў размяшчэння дзіцячых аздараўленчых лагераў. Маніторынгам устаноўлена, што пад’езды і праезды да будынкаў вольныя, сродкі сувязі, сістэмы аўтаматычнай пажарнай сігналізацыі, сістэмы апавяшчэння людзей аб пажары, першасныя сродкі пажаратушэння знаходзяцца ў спраўным стане, абслугоўваючы персанал ведае свае дзеянні пры ўзнікненні пажару.

Аднак не ўсе лагеры адпавядаюць супраць пажарным патрабаванням. Так, пры азнаямленні з супрацьпажарным станам аб’ектаў, дзе плануецца размяшчэнне аздараўленчых лагераў, выяўлены недахопы ў Лявонавіцкім дзіцячым садзе-базавай школе, Раклевіцкім дзіцячым садзе-базавай школе, Жукоўшчынскім дзіцячым садзе-базавай школе, Цэнтры творчасці дзяцей і моладзі горада Дзятлава, гімназіі №1 горада Дзятлава, Цэнтры карэкцыйна-развіваючага навучання і рэабілітацыі. Дырэктарам летніх лагераў гэтых установаў адукацыі ўручаны рэкамендацыі для ліквідацыі выяўленых парушэнняў, абагульненая інфармацыя накіравана ў мясцовыя органы ўлады.

З мэтай забеспячэння пажарнай бяспекі ў дзіцячых аздараўленчых установах з усімі важатымі, выхавальнікамі, медыцынскім і абслугоўваючым персаналам праведзены дадатковыя заняткі па вывучэнні правілаў пажарнай бяспекі, арганізацыі працы баяздольнай добраахвотнай пажарнай дружыны.