Патрабаванні бяспекі пры калектыўных загонных паляваннях

З 1 кастрычніка стартаваў сезон загоннага палявання на капытных, які прадоўжыцца да 31 снежня.

Загоннае паляванне дазволена ў светлы час сутак на ўсе віды капытных жывёл. Выключэнне складае зубр рэзервовага генафонду.

У адпаведнасці з правіламі, ружэйнае паляванне загонам на жывёл ненарміруемых і нарміруемых відаў дазваляецца ў суботу, нядзелю, дзяржаўныя святы, святочныя дні, аб’яўленыя Прэзідэнтам Рэспублікі Беларусь непрацоўнымі, і ў асобныя рабочыя дні ў выпадку іх пераносу Саветам Міністраў Рэспублікі Беларусь на выхадныя дні. Карыстальнік паляўнічых угоддзяў мае права ўстанавіць на сезон палявання дадатковыя дні, але не больш за два, дазволеныя для правядзення стрэльбавага палявання.

Загоннае паляванне – справа калектыўная, якая патрабуе ад яе ўдзельнікаў высокай арганізаванасці і дысцыплінаванасці. Карыстальнікам паляўнічых угоддзяў у абавязковым парадку прызначаецца кіраўнік палявання.

Указанні кіраўніка ў працэсе палявання абавязковыя для выканання для ўсіх удзельнікаў. Перад пачаткам загону кіраўнік абавязаны правесці інструктаж аб правілах бяспекі і парадку правядзення палявання, што пацвярджаецца подпісамі паляўнічых у паляўнічай пуцёўцы. Ён мае права адхіліць ад палявання яе ўдзельніка, які парушае правілы бяспекі або не выконвае яго ўказанні. Вызначае загоншчыкаў, парадак дабору падранкаў, забяспечвае расстаноўку на нумары стралкоў, вырашае ўсе спрэчныя пытанні, афармляе неабходныя дакументы на права палявання, інфармуе аб сігналах, якія выкарыстоўваюцца пры паляванні (пачатак і заканчэнне загоннага палявання, здабыча жывёлы і іншае).

Кіраўнік палявання павінен паказаць стралкам месца знаходжання суседніх нумароў, кірунак загону, дазволены сектар стральбы. Кожны стралок, які стаіць на нумары, павінен дакладна ведаць размяшчэнне суседніх нумароў і ўсёй стралковай лініі.

Зараджаць зброю дазваляецца толькі на нумары. Яе трэба разрадзіць перад сыходам з нумара.

Стральба на паляванні загонам праводзіцца: пасля выхаду паляўнічай жывёлы за стралковую лінію. З дазволу кіраўніка дапускаецца стральба ўнутр і (або) унутры акладу пры ўмове забеспячэння бяспекі. Адказнасць за наступствы стрэлаў унутр і (або) унутры акладу нясе паляўнічы, які робіць выстрал.

Забараняецца праводзіць паляванне ва ўмовах дрэннай бачнасці; выходзіць на сярэдзіну стралковай лініі, у тым ліку прасекі або дарогі, або на яе бок, процілеглы размяшчэнню стралкоў (нумароў); мяняцца нумарамі; самастойна выбіраць месца і сыходзіць з нумара да заканчэння загону, акрамя выпадкаў, калі паляўнічы павінен аказаць неадкладную дапамогу трапіўшаму ў бяду; выкарыстоўваць самазарадную зброю з ёмістасцю магазіна больш чым на 10 патронаў, а таксама патроны да наразной зброі з абалочачнай куляй і да гладкаствольнай зброі з круглай куляй; ажыццяўляць стральбу па паляўнічай жывёле ўздоўж стралковай лініі, за межамі свайго сектара, пасля сігналу аб заканчэнні загону.

Выконваючы гэтыя нескладаныя патрабаванні, вы захаваеце сябе ад няшчаснага выпадку на паляванні.

Віталь МАРОЗ,
начальнік Слонімскай міжраённай інспекцыі аховы жывёльнага і расліннага свету

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga