Новы год, прыйдзі, шчасце, радасць прынясі!

Упершыню за апошнія некалькі гадоў 31 снежня прыпала на выхадны.

А тамудзятлаўчане змаглі яшчэ днём нарэзаць аліўе, прыгатаваць закускі, каб перад боем курантаў на святочнай плошчы 17 Верасня разам развітацца з адыходзячым годам і сустрэць Новы на раённым свяце “Ёлкіны падарункі”.

 

Дапамаглі ім у гэтым артысты Дзятлаўшчыны ў вобразах казачных герояў Скамароха, Дзеда Мароза, Снягурачкі, вясёлых цыганоў. Сваімі песнямі, талентам і выдатным настроем з землякамі дзяліліся Чэслаў Свіб, Сяргей Малышчык, Таццяна Шостка, Ала Чарняўская і Дар’я Сіўко. Разам з імі гараджане і госці райцэнтра ўзгадалі добра знаёмыя і любімыя песні, ад душы патанцавалі.

На ўрачыстасці падвялі вынікі раённага конкурсу на лепшае навагодняе афармленне арганізацый і прыватных падворкаў.

Сярод арганізацый раёна самае прыгожае і арыгінальнае ўбранства ў ААТ “Граніт-Агра”, калектыў якога стаў пераможцам конкурсу, другое месца ў Дзятлаўскага ПМС, трэцяе – у цэнтра карэкцыйна-развіваючага навучання і рэабілітацыі.

Пастараліся стварыць навагодні настрой на ўласных падворках і самі дзятлаўчане. Лепш за ўсіх гэта атрымалася ў пераможцы конкурсу Юліі Цярэшка з вуліцы Чэхава, 2, віцэ-чэмпіёнам стаў Аляксандр Палавінка (вуліца Францыска Скарыны, 5), “бронза” ў Наталлі Лупач (вуліца Кастрычніцкая, 129).

Навагодняе свята не абышлося без традыцыйнай бяспройгрышнай латарэі. Усе ўладальнікі шчаслівых білетаў атрымалі прыемныя падарункі, а галоўны прыз – сокавыціскалку выйграла Аксана Блюднік.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga