Пасля святочнага перапынку дзятлаўчане паспяхова згулялі свой чарговы матч на адкрытым чэмпіянаце горада Ліды па міні-футболе супраць каманды “Чэмпі”.
З самага пачатку сустрэчы лідчане актыўна ўключыліся ў гульню, правялі значную колькасць атак. Дзятлаўскім футбалістам удалося не толькі стрымаць наступальны націск сапернікаў, але і выйсці наперад: на шаснаццатай хвіліне пасля дакладнай перадачы Дзяніса Трафімчыка лік у матчы адкрыў капітан нашай каманды Уладзімір Ганчар.
Настойлівасць гаспадароў пляцоўкі была недарэмнай. Зусім хутка гульцы “Чэмпі” зраўнялі лік. Здавалася, на перапынак каманды пойдуць з нічыйным вынікам. Аднак пад канец першага тайма футбалісты “Граніт-Агра” змаглі вярнуць перавагу: чарговым асістам адзначыўся Дзяніс Трафімчык, гол забіў Ягор Грыцук, лік стаў 2 : 1.
На працягу другога тайма футбольная ініцыятыва пераходзіла ад адной каманды да другой, упэўнена ў сваіх зонах дзейнічалі варатары, а дзятлаўскі галкіпер Мікалай Рагачоў, да таго ж, рэалізаваў пенальці і зняў усе пытанні наконт пераможца матчу. Як вынік, 3 : 1 – дадому з трыма запаветнымі ачкамі.
Вадзім ФІЛІПОЎСКІ
Фота з https://vk.com/lida_champ
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
