Не ведаючы броду, не лезь у ваду

Пракуратура раёна праверыла выкананне заканадаўства аб прафілактыцы гібелі людзей на вадзе на тэрыторыі Дзятлаўскага раёна ў дзейнасці мясцовых выканаўчых і распарадчых органаў, суб’ектаў гаспадарання, за якімі замацаваны вадаёмы.

Як паказаў агляд, праведзены на пачатку чэрвеня, да гэтага часу на некаторых вадаёмах не дэманціраваны масткі і не ўстаноўлены шыльды. Гэта водныя аб’екты паблізу Раманавічаў, Хвінявічаў (адказныя – прыватны прадпрымальнік Д. Харошка і КСУП “Хвінявічы” адпаведна), у вёсцы Парэчча (ААТ “Дзятлаўскі лікёра-гарэлачны завод ”Алгонь” і КСУП “Хвінявічы”), на групе вадаёмаў аграгарадка “Жукоўшчына” (КСУП “Жукоўшчына). Нават на групе азёраў у Раклевічах, дзе летась патануў непаўналетні, адсутнічаюць аншлагі аб забароне купання.

Да 2018 года рашэннем райвыканкама былі вызначаны месцы для купання на рацэ Маўчадка ў Наваельні і Гезгалах. Сёлета з-за арганізацыйных пытанняў купанне там забаронена. Аднак людзі паблізу гэтых месцаў арганізоўваюць пляжы і купаюцца, а мясцовыя выканаўчыя органы не прымаюць адпаведных мераў прафілактыкі. Так, каля аграгарадка Гезгалы на адлегласці 200-300 метраў уніз па цячэнні ад ранейшага пляжу грамадзяне пабудавалі масток для нырання і на момант праверкі там купаліся дзеці, не было забараняючых шыльдаў, хаця на ранейшым пляжы яны ўстаноўлены.

Пералічанае сведчыць аб тым, што адказныя асобы суб’ектаў гаспадарання, за якімі замацаваны вадаёмы, праігнаравалі і не выканалі патрабаванні рашэння №105 і заканадаўства аб прафілактыцы гібелі людзей на вадзе, што недапушчальна.

Пракуратура раёна прапаноўвае разгледзець вынікі праверкі і прыняць адпаведныя меры рэагавання, прыцягнуць да дысцыплінарнай адказнасці асобаў, вінаватых ва ўстаноўленых парушэннях.

Аляксандр ЮРКЕВІЧ,
намеснік пракурора Дзятлаўскага раёна

Стоит почитать:

Адзіны дзень інфармавання прайшоў у раёне

В Беларуси 2018-2020 годы пройдут под знаком Года малой родины

З гумарам і ўручэннем падарункаў падпісваліся на «Перамогу»