Не пакідаць без увагі людзей

Пад кіраўніцтвам намесніка старшыні райвыканкама Вадзіма Бяляткі прайшло пасяджэнне, на якім разглядалася пытанне аб пажарна-прафілактычнай рабоце, праведзенай аглядавымі камісіямі раёна з пачатку года. У ім прынялі ўдзел начальнік аддзела нагляду і прафілактыкі Гродзенскага абласнога ўпраўлення МНС Андрэй Міхальчанка, начальнік раённага аддзела па надзвычайных сітуацыях Сяргей Казушчык, члены рабочай групы.

Сяргей Казушчык паведаміў, што ў 2025 годзе на Дзятлаўшчыне зарэгістраваны чатыры пажары, адзін чалавек загінуў, выяўлены 22 узгаранні сухой расліннасці. З пачатку года работнікамі РАНС абследавана 1401 домаўладанне, у выніку накіраваны 63 інфармацыі суб’ектам прафілактыкі, 18 пісьмаў дзецям пажылых грамадзян, меры адміністрацыйнага ўздзеяння ў жылым сектары прыменены да 42 чалавек.

– Што тычыцца наведвання жылля катэгарыраваных грамадзян, гэту работу неабходна выканаць у сціслы тэрмін, каб потым быў час на ліквідацыю выяўленых недахопаў, – адзначыў Вадзім Бялятка.

Старшыні сельвыканкамаў далі справаздачы па абследаванні домаўладанняў, якія стаяць на ўліку, агучылі пытанні, што ўзнікаюць на тэрыторыі сельскіх саветаў. Акрамя распаўсюджаных праблем, якія выяўляюцца, – няспраўная электраправодка, пячное ацяпленне, газавыя прыборы, – узнікае яшчэ адна: некаторыя грамадзяне не хочуць пускаць у дом членаў камісіі, размаўляць з імі. Як тут быць?

– На тое мы служачыя, і наша задача – пераканаць чалавека ў тым, што гэта патрэбна не толькі правяраючым, але і яму самому. Не ідзіце ўсёй камісіяй, няхай зойдзе хаця б адзін супрацоўнік і ацэніць стан домаўладання. Калі адмаўляюць катэгарычна, пакідаць іх па-за ўвагай нельга, трэба шукаць індывідуальны падыход, будзем падбіраць іншыя меры ўздзеяння, – запэўніў Вадзім Аляксандравіч.

Андрэй Міхальчанка адзначыў, што ў Дзятлаўскім раёне работа па прафілактыцы надзвычайных здарэнняў вядзецца, і станоўчыя вынікі адзначаюцца, падзякаваў за работу і выказаў спадзяванне, што ўзаемадзеянне суб’ектаў прафілактыкі будзе прыносіць плён, людзі будуць заўжды адчыняць дзверы, давяраць і чакаць дапамогі.

Напрыканцы пасяджэння Вадзім Бялятка нагадаў, што хутка пройдуць такія знакавыя мерапрыемствы, як свята 1 Мая, 80 гадоў Перамогі ў Вялікай Айчыннай вайне, Дзень Дзяржаўнага Сцяга, Герба і Гімна, папрасіў звярнуць увагу на навядзенне парадку на тэрыторыях сельскіх саветаў, стан помнікаў, якія там размешчаны.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#МЧС