Станцаваць, паспяваць, прыдумаць пажаданні, паваражыць, увасобіцца ў казачную ролю – ды проста!
17 студзеня ў Дзятлаве прайшоў традыцыйны раённы моладзевы агеньчык “Святкі.by”, які дзятлаўчане яшчэ называюць святам знаёмстваў і гумару, радасці і крэатыву.
Як і ў папярэднія гады, лакацыяй “Святак-2025” выбралі рэстаран райцэнтра “Ліпічанка”.
Сустрэча зноў выдалася багатай на жарты, творчасць, весялосць, танцы і аб’яднала на адной святочнай пляцоўцы прадстаўнікоў сельскагаспадарчых прадпрыемстваў, установаў адукацыі, аховы здароўя раёна.
Поспехаў у рабоце і працоўнага росту ім жадалі першы сакратар раённага камітэта ГА “БРСМ” Кацярына Хілімончык, галоўны спецыяліст аддзела ідэалагічнай работы і па справах моладзі райвыканкама Марына Абрамчык, старшыня раённай арганізацыі прафсаюза работнікаў аграпрамысловага комплексу Уладзімір Казак, старшыня прафсаюзнай пярвічкі цэнтральнай раённай бальніцы Валерый Макарчык.
“Святкі.by” адметныя тым, што гарманічна аб’ядноўваюць у сабе народныя традыцыі, характэрныя для заліхвацкіх святачных гулянняў, і сучасныя формы моладзевага адпачынку, таму заўсёды прыносяць удзельнікам цікавыя сюрпрызы і шмат пазітыву.
– На моладзевым календары Дзятлаўшчыны “Святкі” з’явіліся больш за дзесяць гадоў таму, – расказаў Уладзімір Казак. – У раёне ёсць і больш афіцыйныя сустрэчы, якія мы правялі крыху раней і расказалі вам, чым жыве Дзятлаўшчына, якія магчымасці ёсць у раёне для маладых спецыялістаў. Цяпер мэта іншая – каб вы зарадзіліся энергіяй і творчымі сіламі.
Аднак не магу не падзяліцца з вамі сваімі трывогамі: нядаўна прачытаў у газеце “СБ. Беларусь сёння” артыкул “Лянота, узведзеная ў субкультуру”. Ён аб тым, што ў краінах Захаду сярод моладзі актыўна прапагандуецца творчая лянота. Прыхільнікі гэтай плыні нічога не робяць, толькі адпачываюць, і ўжо чвэрць маладых людзей “пакутуюць на гэту хваробу”. Упэўнены: вы не такія. Я заклікаю вас не стаяць на месцы – развівацца, атрымліваць адукацыю і самаадукацыю, займацца спортам. Поспехаў вам на прафесійным шляху, заставайцеся актыўнымі членамі грамадства, стварайце ўласную будучыню і нашай краіны.
– Сёння апошні вечар Святак, ён чароўны, таму загадвайце жаданні, няхай яны спраўдзяцца, – пажадала Кацярына Хілімончык. – Віншую вас са святамі, творчага настрою, поспехаў, будзьце добрымі спецыялістамі і праслаўляйце сваімі справамі Беларусь.
– Было б прыемна, каб сёння вы пазнаёміліся, а праз некаторы час мы згулялі хоць адно вяселле, – пераняў эстафету пажаданняў Валерый Макарчык. – Жадаю, каб у вас на рабоце было заўжды спакойна і панаваў лад, цярпення вам, здароўя, фінансавага дабрабыту.
На гэтым святочныя сюрпрызы не скончыліся: маладых спецыялістаў раёна чакалі заданні “з капелюша” і знаёмства з Калядой, цікавае апытанне на веданне народных традыцый, затым яны і самі далучыліся да гурта калядоўшчыкаў. Пераапранутыя ў Казу, Мядзведзя, Пеўня, Цыганку, іншых герояў, варажылі калегам.
Насычаная конкурсна-забаўляльная праграма не стаміла ўдзельнікаў “Святак-2025”, і сустрэчу прадоўжыла вясёлая дынамічная дыскатэка.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
