У прыярытэце эканомія і пераарыенціроўка на новыя віды дзейнасці

У Дзятлаве прайшла выязная калегія ўпраўлення дзяржаўнага прадпрыемства “Гроднааблпаліва” пад кіраўніцтвам яго генеральнага дырэктара Івана Крахмальчыка.

У рабоце прынялі ўдзел кіраўнікі філіялаў нашай вобласці, бухгалтарскія службы, прафсаюзны актыў. У цэнтры ўвагі былі вынікі работы ўпраўлення за 2024 год.

– У цэлым мінулы год выдаўся паспяховым, спрацавалі з прыбыткам, хаця сітуацыя па філіялах адрозніваецца, тым не менш, выкананы ўсе ключавыя паказчыкі, – задаў тон размове Іван Крахмальчык. – У Дзятлаўскі філіял быў перададзены лесавоз, машына для сечкі дроваў. Уся тэхніка задзейнічана. На жаль, у апошнія гады выкарыстанне дроваў і брыкету ў вобласці і краіне скарачаецца, бо ўхіл робіцца на іншыя крыніцы цяпла – газавую, электрычную энергію, лясгасы актыўна рэалізуюць пілеты. У сувязі з гэтым і нам варта больш арыентавацца на іншыя віды дзейнасці.

Перш чым пачаць знаёмства з базай Дзятлаўскага філіяла ДП “Гроднааблпаліва” яго дырэктар Васіль Шпакоўскі зрабіў невялікі экскурс у гісторыю. Расказаў, што філіял быў створаны ў 1972 годзе. З 1987-га, акрамя брыкету і торфу, пачаў прадаваць сечаныя дровы. У 2019-м тут запусцілі сваю пілараму. За апошнія гады ў філіяле шмат зроблена як у плане рамонтаў, так і бяспекі, эканоміі, аховы працы, нядаўна нават высаджаны невялікі пладовы сад. Ва ўсім гэтым госці ўпэўніліся ў час экскурсіі па тэрыторыі.

Прадоўжылася калегія ў раённым выканаўчым камітэце.

На дзятлаўскай зямлі яе ўдзельнікаў павітаў і расказаў пра спецыфіку раёна старшыня райвыканкама Андрэй Садоўскі. Спыніўся і на рабоце мясцовага філіяла:

– Мы прааналізавалі, што за апошнія пяць гадоў спажыванне цеплаэнергіі ў гігакалорыях скарацілася на 20 %, а гэта і ваша крыніца даходаў. Зразумела, што сітуацыя вымушае адшукваць новыя магчымасці заробку і пазіцыі для эканоміі.

З асноўным дакладам аб выніках работы ўпраўлення выступіў намеснік генеральнага дырэктара па эканоміцы ДП “Гроднааблпаліва” Уладзімір Сазонаў. Адзначана, што ў цэлым па прадпрыемстве рэалізавана тавараў, работ, паслугаў на суму 18,8 мільёна рублёў, адсочваецца станоўчая дынаміка. З адмоўнай спрацавалі сем філіялаў. Традыцыйна выручка складалася з чатырох асноўных напрамкаў дзейнасці: рэалізацыі брыкету, дроваў цвёрдага паліва; гандлю; аказання паслуг; рэалізаццыі дранкі. Першая пазіцыя за год зменшылася на 3,9 %, астатнія – “прыраслі”. Напрыклад, паслугаў аказана на суму 3 мільёны 931 тысячу рублёў, гандаль прынёс 3 мільёны 10 тысяч. Адпаведна для забеспячэння фінансавай стабільнасці кожнаму філіялу трэба развіваць некалькі эфектыўных кірункаў дзейнасці і мець розныя крыніцы даходаў. Сярод філіялаў па атрыманні прыбытку на аднаго рабочага ў мінулагодніх лідарах Шчучынскі, Астравецкі, Ашмянскі філіялы. Як ужо было адзначана, у цэлым па прадпрыемстве выкананы ключавыя паказчыкі – гэта чысты прыбытак, рэнтабельнасць продажаў, зніжэнне ўзроўню затрат. Уключаны яны і ў пералік задач на 2025 год, а таму філіялам, якім не ўдалося паспяхова справіцца з пэўнымі паказчыкамі, давядзецца прааналізаваць і выправіць сітуацыю. Сярод пытанняў, на якія таксама трэба сёлета звярнуць увагу, – работа з кліентамі па пагашэнні дэбіторскай запазычанасці і рост заработнай платы.    

Са справаздачамі аб стане спраў у сваіх арганізацыях выступілі кіраўнікі Навагрудскага і Дзятлаўскага філіялаў.

Васіль Шпакоўскі адзначыў, што ў апошнія тры гады на Дзятлаўшчыне назіраецца спад па рэалізацыі дроваў і брыкету. Кірунак жа, па якім “плюсуюць” амаль у два разы, – гэта продаж дранкі. Па пазіцыях: дровы і брыкет займаюць 42 % долі прыбытку, паліўная дранка – 14,4 %, паслугі – 24 %, іншы прыбытак – 18 %. Тэхніка ў філіяле не новая, аднак за ёю ажыццяўляецца належны догляд, таму працуе надзейна. Леташні планавы паказчык – адзін мільён прыбытку – дасягнуты.

Іван Крахмальчык у час пасяджэння даў станоўчую ацэнку Дзятлаўскаму філіялу і яго калектыву.

Заслухалі таксама інфармацыю аб кантрольна-аналітычных мерапрыемствах, праведзеных спецыялістамі галоўнага кантрольнага упраўлення Гродзенскага аблвыканкама, і мерах па папярэджанні такіх парушэнняў.

Прыемным момантам стала падвядзенне вынікаў спаборніцтва сярод філіялаў ДП “Гроднааблпаліва” за дасягненне высокіх паказчыкаў фінансавага развіцця ў мінулым годзе. У пяцёрку лідараў увайшлі самы паспяховы Шчучынскі філіял, на другой пазіцыі – Астравецкі, на трэцяй – Воранаўскі, чацвёртае і пятае месцы адпаведна ў Мастоўскага і Слонімскага філіялаў. Першая тройка адзначана заслужанымі ўзнагародамі і грашовымі прэміямі.

У рамках сустрэчы была праведзена яшчэ і справаздачная канферэнцыя пярвічнай прафсаюзнай арганізацыі ДП “Гроднааблпаліва”.

Завяршылася выязная калегія на прыемнай ноце: для яе ўдзельнікаў у Дзятлаўскім раённым цэнтры культуры і народнай творчасці быў арганізаваны ўрачысты канцэрт, у час якога з надыходзячым 8 Сакавіка павіншавалі жанчын галіны.

Ірына СТЫРНІК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашалепшае #нашелучшее