Любіце катацца – вазьміце на заметку

Угон транспартных сродкаў – тэма актуальная для многіх краін, і Беларусь не выключэнне.

Парадамі, як зберагчы машыну ад злодзеяў, падзяліўся старшы следчы раённага аддзела Следчага камітэта Аляксандр Макуца:

– Аўтамабілі для беларусаў становяцца ўсё больш даступнымі, а таму ў карыстанні сярэднестатыстычнай сям’і можа быць і не адна машына. Аднак гэта зусім не значыць, што беларускія аўтааматары іх не цэняць. Вядома ж, кожнаму гаспадару хочацца выязджаць па сваіх справах і вяртацца дахаты без прыгодаў і непрыемнасцяў.

Каб машына не стала аб’ектам пасягальніцтваў, на яе трэба ўстанавіць надзейную сігналізацыю, забяспечаную функцыямі рэагавання на рух, адкрыванне дзвярэй, разбіццё шкла.

Варта выкарыстоўваць і дадатковыя ахоўныя прыстасаванні як, напрыклад, блакіратар руля ці педалі акселератара, якія абцяжарваюць угон і дапамагаюць праваахоўнікам хутчэй выявіць злачынцу.

Ніколі нельга пакідаць свой транспартны сродак з адчыненымі дзвярамі ці вокнамі нават на кароткі час. А пры выбары месца паркоўкі перавагу аддаваць добра асветленым, тым, што ахоўваюцца або знаходзяцца ў зоне агляду відэакамер.

Дрэнную службу могуць саслужыць і каштоўныя рэчы, якія засталіся ў машыне на бачным месцы. Іх лепш прыбраць з вачэй, каб не сталі прынадай для зламыснікаў, а потым і прычынай угону.

Ірына СТЫРНІК 

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga