У Дзятлаве прайшоў занальны этап абласной прафілактычнай квэст-гульні “Будзь прыкладам”, скіраванай на прававую адукацыю моладзі, у тым ліку падлеткаў, якія знаходзяцца на розных відах уліку, папулярызацыю здаровага ладу жыцця, прафілактыку правапарушэнняў сярод непаўналетніх.
Арганізатары спаборніцтваў — Гродзенскі абласны камітэт ГА “БРСМ”, упраўленне адукацыі, упраўленне ўнутраных спраў, упраўленне спорту і турызму Гродзенскага аблвыканкама.
У Дзятлаве спаборнічалі каманды падлеткаў з Зэльвенскага, Шчучынскага, Воранаўскага, Дзятлаўскага раёнаў. Стартаваў квэст у Дзятлаўскім раённым цэнтры культуры і народнай творчасці.
Удзельнікаў квэст-гульні павіталі першы сакратар Дзятлаўскага раённага камітэта ГА “БРСМ” Кацярына Хілімончык і начальнік інспекцыі па справах непаўналетніх АУС Дзятлаўскага райвыканкама Віктар Петрукевіч.
Віктар Віктаравіч расказаў, што гульня “Будзь прыкладам” пачынае летні адпачынак школьнікаў, які павінен стаць бяспечным, актыўным і цікавым. Квэст дапаможа падлеткам навучыцца быць камандай, арыентавацца ў незнаёмай мясцовасці, павысіць прававую адукаванасць і культуру. Завершыцца мерапрыемства ў аддзеле ўнутраных спраў Дзятлаўскага райвыканкама, дзе ўдзельнікі квэст-гульні пазнаёмяцца з работай міліцыі.
Каманды накіраваліся на этапы. Ім неабходна было прайсці маршрут, на якім знаходзіліся сем прыпынкаў з гульнёвымі заданнямі: “Збяры прыказку”, “З песняй па праве”, “Права з вуснаў продкаў”, “Правільна — няправільна”, “Наадварот”, “Юрыдычная кансультацыя”, “Законатворца”. Падлеткам давялося адгадваць прыказкі, песні, прававыя артыкулы, складаць з частак словы і прававыя нормы. За правільныя адказы на этапах каманды атрымлівалі ключы-паролі, дзякуючы якім на фінішы можна было адшукаць клад.
Безумоўна, лепш за іншых на маршруце арыентаваліся гаспадары пляцоўкі — дзятлаўчане, астатнім было крыху складаней знаходзіць прыпынкі. Аднак у гасцей быў шанц адыграцца на інтэлектуальных заданях, дзе ствараліся аднолькавыя ўмовы для ўсіх ігракоў квэсту. Хто першы дабярэцца да запаведнага куфра з кладам, доўгі час заставалася загадкай.
Нарэшце каманды з наборамі ключоў-пароляў сабраліся на стадыёне “Колас”, дзе ладзіўся фінальны этап. З ключоў на хуткасць складалі адзін з артыкулаў Канстытуцыі Рэспублікі Беларусь. Першай зноў справілася каманда гаспадароў пляцоўкі.
Для падвядзення вынікаў накіраваліся ў раённы аддзел міліцыі, дзе падлеткаў таксама пазнаёмілі з ахоўнымі прыстасаваннямі, якія ў сваёй рабоце выкарыстоўваюць праваахоўнікі, і далі прымерыць экіпіроўку міліцыянера.
Вынікі квэст-гульні падвяла першы сакратар раённага камітэта ГА “БРСМ” Кацярына Хілімончык. Трэцяе месца заняла каманда “Зоркі” Зэльвенскага раёна. Другое месца падзялілі каманды “Блэкфокс” са Шчучынскага раёна і “Вораны” з Воранаўскага раёна. Пераможцай квэст-гульні “Будзь прыкладам” стала каманда падлеткаў Дзятлаўскага раёна.
Пераможцы і прызёры атрымалі дыпломы, падарункі і салодкія прызы ад раённых камітэтаў ГА “БРСМ”-удзельнікаў сустрэчы.
Варта зазначыць, што сёлета ў верасні дзятлаўчане, якія перамаглі на занальным этапе, накіруюцца ў Гродна, каб прыняць удзел у абласным этапе прафілактычнай квэст-гульні “Будзь прыкладам”.
І. КАЎКЕЛЬ
Фота аўтара
