На Дзятлаўшчыне стартавалі мерапрыемствы, прымеркаваныя да 100-годдзя Узброеных Сіл Рэспублікі Беларусь.
Першыя юбілейныя медалі ўручылі сёння ветэранам Вялікай Айчыннай вайны, якія жывуць у Дзятлаўскім раёне, Марыі Пятроўне Глебавай і Фёдару Васільевічу Шалеснаму. Напярэдадні 23 лютага павіншаваць са святам і ўручыць юбілейны медаль да іх у госці прыехалі старшыня раённага выканаўчага камітэта Аляксандр Дубовік, ваенны камісар Дзятлаўскага раёна Генадзь Суравец.
Сустрэча з Марыяй Пятроўнай адбылася ў Таркачоўскім дзіцячым садзе-пачатковай школе.
Віншаванні, кветкі, падарункі ветэрану Марыі Глебавай таксама адрасавалі старшыня Данілавіцкага сельвыканкама Ганна Жых, намеснік старшыні па ідэалагічнай рабоце ААТ “Граніт-Агра” Кацярына Дубешка, вучні і адміністрацыя школы.
Пасля за душэўнай размовай, успамінамі пабавілі час.
“…З Беларуссю Марыю Пятроўну Глебаву, у дзявоцтве Някрасаву, звязвае найперш ваеннае ліхалецце. На Магілёўшчыне загінуў бацька, доўгі час сям’я не ведала пра яго лёс. А ўжо значна пазней, пасля шматлікай перапіскі з установамі, знайшлі пасёлак Янева, дзе ён пахаваны. У Беларусі ваяваў старэйшы брат. У Беларусі жылі і жывуць сваякі. Да іх пераехала Марыя Пятроўна, калі ў Расіі не засталося блізкіх.
У 1944 годзе пры медсанбаце яфрэйтар Някрасава скончыла курсы медыцынскіх сясцёр і была залічана санінструктарам у свой 485-ы полк. У Малдавіі яна ратавала параненых салдат — перавязвала раны, выцягвала на плашчы-палатцы з поля бою, як магла, падтрымлівала добрымі словамі.
Аднойчы, сама апынуўшыся за крок ад пагібелі, выжыла і вырвала ў смерці яшчэ адно жыццё. Полк фарсіраваў раку Паўднёвы Буг паблізу горада Мікалаева. Паром, якім разам з баявымі таварышамі перапраўлялася Марыя, трапіў пад бамбёжку. Выбуховай хваляй дзяўчыну адкінула ў ледзяную ваду, якая кіпела ад снарадных асколкаў. Дзяўчыну ўратавала толькі тое, што яна вырасла на рацэ Хапёр і выдатна плавала. Яна дабралася да берага сама і выцягнула салдата…”
Нагадаю, што ўручэнне юбілейных медалёў «100 год Узброеным Сiлам Рэспублікі Беларусь» ветэранам Вялікай Айчыннай вайны ў Дзятлаўскім раёне будзе доўжыцца да 23 лютага.
Тэкст, фота, відэа Ірыны КАМАРОВАЙ
