Гучы, родная мова

У дашкольным цэнтры развіцця дзіцяці №2 горада Дзятлава праводзіцца работа па папулярызацыі беларускай мовы.

Пры афармленні дзіцяці ў дашкольны цэнтр з бацькамі індывідуальна вядзецца гутарка аб тым, што яны маюць права выбраць мову навучання ў любой узроставай групе. Яны знаёмяцца з нарматыўнымі дакументамі па арганізацыі адукацыйнага працэсу на роднай мове, атрымліваюць інфармацыю на стэндах, сайце ўстановы, у час бацькоўскіх сходаў, анкетавання.

У 2017-2018 навучальным годзе па запытах бацькоў у старэйшай групе №11 адукацыя арганізоўвалася на беларускай мове.

Выхавальнікі, музычныя кіраўнікі, кіраўнікі фізічнага выхавання праводзілі заняткі на роднай мове. Яны імкнуліся стварыць максімальна спрыяльня умовы для развіцця ў выхаванцаў маўленчых навыкаў.

Выхавальнікі Алена Конан, Вольга Бойка нароўні з заняткамі ўключалі дзяцей у цікавыя і новыя формы зносін, ролевыя дыялогі, тэатральнае падарожжа па беларускіх казках, гульнявую праграму “Як мова гучыць?”, творчую гульню “Вокладка любімай кнігі”, віктарыну “Цацка чараўніца”, віртуальную экскурсію “Мая Беларусь”, тыдзень кнігі, паэтычна-музычны вечар “Мой родны кут, як ты мне мілы…”, чыталі легенды, практыкавалі выпуск тэматычных фотаальбомаў.

Сярод выхаванцаў 5-6 гадоў быў праведзены конкурс на лепшае чытанне твораў беларускай мастацкай літаратуры і фальклору “Лепшы расказчык”.

На працягу года былі арганізаваны экскурсіі па горадзе, у раённую бібліятэку, гарадскі парк і да абеліска, краязнаўчы музей. Выхаванцы выступалі з народнымі мастацкімі нумарамі ў раённым Цэнтры культуры і Цэнтры сацыяльнага абслугоўвання насельніцтва.

Дзеці, якія наведвалі групу з беларускай мовай навучання, добра валодаюць асаблівасцямі граматычнага ладу роднай мовы, адказваюць на пытанні, разумеюць і называюць абагульняючыя словы, правільна ўжываюць формы ветлівасці, пераказваюць тэксты, складаюць сказы.

Вядома, дзеці часцей маюць зносіны з бацькамі дома і ў групе адзін з адным на рускай мове, але яны добра ведаюць, як цудоўна гучыць беларуская гаворка, якія займальныя беларускія гульні, якія меладычныя беларускія песні і вершы.

Ва ўстанове адукацыі пастаянна ўдасканальваюцца ўмовы для атрымання адукацыі на беларускай мове. Пры падрыхтоўцы да 2018-2019 навучальнага года ў сярэдніх і старэйшых групах аформлены сюжэтна-ролевыя гульні “Турыстычнае агенцтва”, “Рэдакцыя газеты “Перамога”, “Белпошта”, падабраны пазнавальныя прэзентацыі для выхаванцаў на тэмы: “Родная прырода”, “Экскурсія ў музеі”, “Тэатры Беларусі”, “Замкі Беларусі”, “Славутасці роднага горада”, “Мінск”, “Белавежская пушча”, распрацаваны гульнявы дыдактычны блок “Мая Беларусь” для выкарыстання на інтэрактыўнай дошцы.

Спадзяёмся, у гэтым навучальным годзе таксама будзе функцыянаваць група з беларускай мовай навучання.

Марына ЯНУШКЕВІЧ,
намеснік загадчыцы дашкольнага цэнтра развіцця дзіцяці №2 горада Дзятлава