ГрадусПлюс. Махлярства як па падручніку

Заўсёды шкада губляць уласныя грошы, асабліва крыўдна гэта рабіць пад Новы год. Аднак, на жаль, крымінальная статыстыка папоўнілася новым фактам махлярства, на якое “папаўся” жыхар Дзятлаўшчыны.

Сітуацыя да банальнага простая, пра такія расказваюць сёння практычна на кожным прафілактычным мерапрыемстве, але ў момант “ікс” людзі быццам забываюць пра тое, аб чым іх папярэджвалі.

У аддзел унутраных спраў райвыканкама звярнуўся 54-гадовы мясцовы жыхар, які паведаміў, што з яго банкаўскай карткі знялі шэсць тысяч рублёў.

Супрацоўнікі крымінальнага вышуку райаддзела ўстанавілі, што 26 снежня мінулага года мужчыну паступіў званок на Вайбер ад невядомага, які прадставіўся супрацоўнікам міліцыі і паведаміў, што ад імя грамадзяніна зламыснікі быццам бы спансіруюць ваенныя дзеянні на тэрыторыі суседняй дзяржавы. Каб перапыніць гэта і вывесці на чыстую ваду несумленных супрацоўнікаў банка, на рахунах трэба пакласці рэальныя грошы, якія потым будуць вернуты гаспадару. Псеўдаміліцыянер паведаміў, што ў далейшым будзе падтрымліваць сувязь праз сваю калегу Кацю.

Такой сумы наяўных грошай у мужчыны не было, таму ён звярнуўся ў банк для афармлення крэдыту. Атрымаўшы патрэбную суму, ён паведаміў аб гэтым зламыснікам, якія перавялі грошы на свой рахунак дыстанцыйна.

Аб тым, што нешта тут нячыста, мужчына стаў здагадвацца толькі тады, калі Кацярына стала настойваць на афармленні яшчэ аднаго крэдыту. Ён звярнуўся ў міліцыю, аднак страчаную суму, за якую яшчэ доўга давядзецца выплачваць крэдыт, ужо наўрад ці ўдасца вярнуць. 

– Па дадзеным факце распачата крымінальная справа па артыкуле “Крадзеж маёмасці шляхам мадыфікацыі камп’ютарнай інфармацыі”, – расказаў следчы раённага аддзела Следчага камітэта Аляксей Клок. – У ходзе расследавання было высветлена, што атрыманая махлярскім спосабам сума была пералічана на крыптавалютны рахунак грамадзяніна Расійскай Федэрацыі. У дадзены момант рыхтуем даручэнне на допыт згаданай асобы, аднак верагоднасць вярнуць пацярпеламу страчаныя грашовыя сродкі мінімальная. Каб папярэдзіць, пераканаўча просім грамадзян не ўступаць у размовы з невядомымі асобамі ў месенджарах, нікому не перадаваць асабістыя звесткі і даныя банкаўскіх картак. Калі вы сталі ахвярай махлярства, неадкладна паведаміце ў праваахоўныя органы.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga