Год імянінніка – 2018

У шырокім фармаце свята імяніннікаў вырашылі адзначыць спецыялісты і наведвальнікі аддзялення дзённага знаходжання для інвалідаў “Праменьчык” Цэнтра сацыяльнага абслугоўвання насельніцтва Дзятлаўскага раёна.

На гэты раз яны віншавалі і ўшаноўвалі імяніннікаў кожнага сезона 2018 года.

Святочная сустрэча з такой нагоды прайша ў кафэ кінатэатра “Спадарожнік” горада Дзятлава, тут жа ладзілася дыскатэка для ўдзельнікаў урачыстасці. Цёплая сяброўская атмасфера мерапрыемства заахвочвала прысутных дзяліцца кампліментамі, жартамі, шчырымі віншаваннямі і, вядома, актыўна ўдзельнічаць у шматлікіх забаўляльных конкурсах, багатых на прызы.

Імяніннікаў кожнага месяца называлі пайменна, асобна павіншавалі юбіляраў 2018 года – Анатоля Ляпешку, Аляксандра Панкевіча, Таццяну Талкун, Анжэлу Абярухціну, Ульяну Лукашэню, Святлану Аўцюховіч, Максіма Амбражэя. Ніхто не застаўся без добрых пажаданняў і сувеніраў.

Асабліва яркія ўражанні пакінулі гульні і конкурсы ад вядучых, у ролі якіх выступілі спецыялісты “Праменьчыка” Алена Калюцік і Валянціна Саламевіч. Каб атрымаць запаветныя прызы, удзельнікам даводзілася лічыць гузікі на сваім адзенні, узгадваць, ці ёсць у іх люстэрка і памада, з завязанымі вачамі навобмацак вызначаць харчовыя прадукты, трапна кідаць мячы з газеты.

За цёплы прыём і дапамогу ў правядзенні сустрэчы яе ўдзельнікі дзякуюць дырэктару кінатэатра “Спадарожнік” Юрыю Скрабцу, відэадэманстратару Алене Высоцкай, бармэну Ірыне Сарачынскай.

Ірына КАЎКЕЛЬ