Гайдукевіч лічыць неабходным зрабіць з чыноўнікаў дзяржаўнікаў

Кандыдат у Прэзідэнты Беларусі Сяргей Гайдукевіч лічыць неабходным зрабіць з чыноўнікаў дзяржаўнікаў. Аб гэтым ён заявіў сёння, выступаючы на Першым нацыянальным канале Беларускага радыё, паведамляе БЕЛТА.

На думку Сяргея Гайдукевіча, у краіне наспелі перамены — у прыватнасці, настаў час для эфектыўных рэформ у эканоміцы, кіраванні дзяржавай. «Трэба зрабіць з чыноўнікаў дзяржаўнікаў. Беларусі патрэбны не клеркі, але людзі з дзяржаўным мысленнем, ініцыятыўныя кіраўнікі, а не людзі, якія баяцца страціць «цёплае» крэсла. Дзяржаўнік усведамляе ўсю асабістую адказнасць перад Айчынай, адказвае за свае дзеянні і не баіцца праяўляць ініцыятыву на карысць Радзіме», — адзначыў ён.

Кандыдат выказаў меркаванне, што настаў час «ствараць цывілізаванае, салідарнае дэмакратычнае грамадства», і са шкадаваннем канстатаваў, што «ў Беларусі пакуль так не склалася». «Дзяржаўная эліта, яе ніша, не занята. Ёсць, вядома, уладныя колы, праўладныя структуры, але гэтага мала», — лічыць ён. «Краіне патрэбна палітычная эліта, і чым яна будзе больш, тым лепш», — лічыць кандыдат.

«Мы бачым, што робіць улада, і ўлічваем усё станоўчае, але бачым таксама шмат памылак, недапрацовак», — сказаў Сяргей Гайдукевіч, адзначыўшы, што «часам памылкі робяцца на пустым месцы». На яго думку, «вышэйшае кіраўніцтва краіны ў цэлым паказала сябе эфектыўным менеджарам, адэкватнай палітычнай сілай, але па шэрагу прычын не можа ўпэўнена рухаць краіну далей і развіццё тармозіцца». «Няма на каго апірацца. Уладныя колы звужаюцца. На месцах няма добрай змены, а цэнтру неабходна надзейная апора», — перакананы ён.

Паводле слоў Сяргея Гайдукевіча, прадпрыемствы «скочваюцца ўсё ніжэй і ніжэй па якасці прадукцыі», а шэраг вытворчасцей проста «працуюць на забіўку складоў». «Колькі гаварылася аб мадэрнізацыі, і ў тэхнічным плане яна адбываецца, але вось у галовах кіраўнікоў усё па-старому: дай план — і ўсё!», — сказаў кандыдат на вышэйшую дзяржаўную пасаду.

Ён таксама звярнуў увагу, што «часта распараджэнні кіраўніцтва краіны не выконваюцца на месцах», у той час як робяцца справаздачы аб выкананні, а на практыцы справы ідуць інакш.

Сяргей Гайдукевіч у сувязі з гэтым расказаў, якім, на яго думку, павінен быць ідэальны міністр. «Міністр як чалавек, які мае ў сваім падпарадкаванні якія-небудзь заводы, вытворчасці, канцэрны, павінен ведаць стан спраў на іх не горш за кіраўніка прадпрыемства. Ён павінен планаваць, бываць на гэтых заводах не ў якасці фешэнебельнай праверкі і незалежна ад рашэння калегіі. Гэта менеджар, чалавек, які павінен умець планаваць сітуацыю», — расказаў ён.

«Хачу сказаць сумленна і шчыра: у Беларусі шмат зроблена за гэтыя гады. З задавальненнем гавару вялікі дзякуй Прэзідэнту краіны, Аляксандру Рыгоравічу, за тое, што ён захаваў суверэнітэт і незалежнасць Беларусі, утрымаў сітуацыю. Гэта дарагога каштуе. Але настаў час рабіць далейшыя крокі па развіцці нашай краіны», — лічыць Сяргей Гайдукевіч.