Вербніцу, або Пальмавую нядзелю, сёння адзначылі каталікі ў памяць уваходу Іісуса Хрыста ў Іерусалім.
Уваход Іісуса ў Іерусалім адбыўся за тыдзень да яго ўкрыжавання. На Беларусі замест пальмавых галінак вернікі бяруць вярбу.
Галінка вярбы сімвалізуе сабой перамогу жыцця над смерцю. Асвечаныя вербы прынята захоўваць у доме ўвесь наступны год.
У касцёле Унебаўзяцця Найсвяцейшай Панны Марыі ў Дзятлаве сабралася шмат вернікаў, якія прыйшлі на імшу і асвяшчэнне вярбы. Ва ўрачыстасці Пальмавай нядзелі ўпершыню ўдзельнічаў вослік, якога вёў ксёндз-пробашч Здзіслаў Пікула. Прыхаджане з захапленнем віталі іх.
Удзел у святой імшы прыняў ксёндз Юрый, рэкалекцыяніст. Ён разам з міністрантамі прачытаў апісанне Мукі Хрыста, літургічны ўспамін падзеяў, у якіх здзейснілася збаўленне свету.
Усе прысутныя ў касцёле перадалі адзін аднаму знак супакою, паціснуўшы рукі.
Ад імя парафіян адна з прыхаджанак падзякавала ксяндзу Юрыю за яго служэнне, самаахвярную працу, добразычлівасць, абвяшчэнне Божага слова. Пажадала ўсяго самага найлепшага, каб побач з ім былі сапраўдныя, добрыя людзі, каб Маці Божая заўсёды благаслаўляла і ўкрывала ад усяго дрэннага, а сэрца заўсёды было напоўнена супакоем і любоўю.
Напрыканцы святой імшы ксёндз Здзіслаў Пікула падзякаваў усім, хто сёння сабраўся ў такі важны дзень.
Вольга ЮШКЕВІЧ
