Добрыя справы не заканчваюцца

14 студзеня ў Беларусі – адзіны тэматычны дзень “Добрыя справы на Новы год!”, якім завяршаецца дабрачынная рэспубліканская акцыя “Ад усёй душы”. На Дзятлаўшчыне яна падарыла многім жыхарам нашага раёна шмат увагі, дабрыні, сардэчнасці і прыемных падарункаў.

У гарадскім пасёлку Наваельня ў гэты дзень госці завіталі да 92-гадовай былой настаўніцы пачатковых класаў Валянціны Кузьміной. Намеснік старшыні райвыканкама Вадзім Бялятка і начальнік аддзела адукацыі райвыканкама Марына Лашкоўская павіншавалі доўгажыхарку з цудоўнымі навагоднімі і каляднымі святамі, пажадалі моцнага здароўя, бадзёрасці, яшчэ доўга быць такой жа аптымістычнай і жыццярадаснай.

Валянціна Міхайлаўна была шчыра радая гасцям, падзялілася, што яе не забываюць ні мясцовыя ўлады, ні настаўнікі роднай Новаяльнянскай школы, дзе яна адпрацавала шмат гадоў, заўжды аказваюць любую дапамогу, за што шчыра ўсім падзякавала. Нягледзячы на свае паважаныя гады, праблемы са зрокам, гэтая аптымістычная жанчына гаворыць, што ніколі не сумуе і не адчайваецца, займаецца зарадкай, ходзіць у лазню, вельмі любіць, калі да яе прыходзяць госці, бо жыве адна, не забываюць многія яе былыя вучні.

У рамках акцыі “Нашы дзеці”, якая таксама падышла да завяршэння, у вёсцы Лапушна наведалі сям’ю Татур-Патапчык, у якой мама адна выхоўвае дваіх сыноў Кірыла і Ілью. Госці вырашылі парадаваць дзяцей цукеркамі і фруктамі. Яны пажадалі хлопчыкам стаць дастойнымі грамадзянамі нашай краіны, добра вучыцца, займацца спортам, быць сапраўднымі мужчынамі і заўжды дапамагаць маме.

Святлана ГРЫШЫНА

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga

#нашелучшее #нашалепшае #нашидети