На базе Казлоўшчынскага сацыяльнага пансіяната “Колас” прайшоў семінар-вучоба па выкананні заканадаўства аб ахове працы і пажарнай бяспецы. Галоўны спецыяліст упраўлення па працы, занятасці і сацыяльнай абароне райвыканкама Святлана Латушка адзначыла важнасць і неабходнасць падобных мерапрыемстваў, таму што траўмы на вытворчасці фіксуюцца штогод, а летась у вобласці павялічылася колькасць траўмаў са смяротным зыходам. Святлана Іванаўна заклікала ўсіх быць уважлівымі, берагчы сябе, бо многае залежыць ад дзеянняў самога чалавека.
Доказам таму, як неабачлівасць і неасцярожнасць работнікаў можа абярнуцца для іх трагедыяй, сталі фільмы, падрыхтаваныя Дэпартаментам дзяржаўнай інспекцыі працы на аснове запісаў з камер відэаназірання на вытворчасці. Пэўна, ні аднаго чалавека ў зале іх прагляд не пакінуў раўнадушным і прымусіў задумацца.
Галоўны інспектар Навагрудскай інспекцыі працы Аляксандр Паўловіч расказаў пра аналіз вытворчага траўматызму, тыповыя парушэнні заканадаўства аб ахове працы, якія выяўляюцца ў ходзе праверак арганізацый.
– У год у нашай рэспубліцы на вытворчасці гіне каля 250 чалавек, каля 800 атрымліваюць цяжкія траўмы. У мінулым годзе ў Дзятлаўскім раёне адбылося шэсць выпадкаў траўматызму, – адзначыў Аляксандр Аляксандравіч.
Таксама ён звярнуў увагу на патрабаванні да абсталявання на вытворчасці, спецадзення, умоваў працы ў неацяпляемых памяшканнях, растлумачыў алгарытм дзеянняў пры атрыманні работнікам траўмы.
Захаваць жыццё і здароўе на працы немагчыма і без выканання патрабаванняў пажарнай бяспекі. На гэтым спыніўся намеснік начальніка Дзятлаўскага РАНС Сяргей Кухарчык, а таксама прапанаваў паглядзець відэаролікі і ўзгадаць, як правільна карыстацца вогнетушыцелем і як паводзіць сябе пры эвакуацыі.
– Не менш важнай як на вытворчасці, так і ў побыце з’яўляецца і электрабяспека. Сачыце за спраўнасцю электраправодкі, будзьце ўважлівыя пры эксплуатацыі электраабсталявання, – нагадаў інспектар энергагазінспекцыі Валянцін Касцюкевіч.
Марыя Шымчык, памочнік доктара-гігіеніста Дзятлаўскага райЦГЭ, расказала работнікам пансіяната пра арганізацыю перыядычных і пазачарговых медыцынскіх аглядаў.
На пытанні аб ажыццяўленні прафсаюзамі грамадскага кантролю захавання заканадаўства аб ахове працы спыніўся старшыня Дзятлаўскага райкама прафсаюза работнікаў аграпрамысловага комплексу Уладзімір Казак.
Падобная сустрэча ў гэты дзень адбылася на ТАА “Белтэрміз”.
Святлана ГРЫШЫНА
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
