Алена Васкель: “Змяненні прадыктаваны часам”

У Беларусі праходзяць грамадскія абмеркаванні праекта закона аб УНС і выбарчым заканадаўстве.

Сваімі думкамі на гэты конт падзялілася начальнік упраўлення па працы, занятасці і сацыяльнай абароне райвыканкама, старшыня раённай арганізацыі “Беларускі саюз жанчын” Алена Васкель:

– Ні ў адной дзяржаве няма такога органа, як Усебеларускі народны сход. У састаў УНСу войдуць прадстаўнікі розных рэгіёнаў, сфер дзейнасці, з рознымі поглядамі, гэта значыць, што члены працоўных калектываў і грамадскіх аб’яднанняў змогуць прымаць непасрэдны ўдзел у палітычным жыцці краіны на такім высокім узроўні.

На сходзе можна будзе задаць пытанні па тых ці іншых кірунках, абмеркаваць найбольш значныя тэмы. УНС будзе мець магчымасць адмяняць нарматыўныя прававыя акты і іншыя рашэнні, якія будуць дзейнічаць у разрэз з інтарэсамі нацыянальнай бяспекі, знешняй і ўнутранай палітыкі нашай краіны.

Каб жыццё наша паляпшалася, якасць яго павышалася, людзі павінны адчуваць, што яны прымаюць непасрэдны ўдзел у кіраванні краінай, уплываюць на прыняцце рашэнняў.

Змяненні ў Выбарчы кодэкс прадыктаваны часам, яны сучасныя і дэмакратычныя. Роўныя магчымасці ўдзелу прадастаўлены як выбаршчыкам, так і прэтэндэнтам на выбранне. Падтрымліваю адзіны дзень галасавання. Згодна з адменай арганізацыі ўчасткаў для галасавання за мяжой. Людзі, якія жывуць па-за Рэспублікай Беларусь доўгі час, не ўдзельнічаюць у жыцці краіны штодзень, ці могуць ацэньваць сітуацыю без скажэння? А тыя грамадзяне, што выязджаюць у камандзіроўку, свабодна могуць прагаласаваць датэрмінова – заканадаўства гэта дазваляе.

Ірына СТЫРНІК    

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga