Вясновыя палявыя работы ў раёне ўваходзяць у сваю актыўную стадыю. Тэхніка і насенне падрыхтаваны, з дня на дзень усе сельгаспрадпрыемствы пачнуць сяўбу ранніх яравых культур.
Галоўны аграном ААТ “Граніт-Агра” Алена Майсейчык адзначае, што, каб спадзявацца на добры ўраджай, аграрыям цяпер трэба як мага хутчэй “закрыць” вільготны слой зямлі перад сяўбой.
– Плошча сяўбы ранніх яравых культур у нашай гаспадарцы складае 1169 гектараў, з іх 819 гектараў выдзелены пад ячмень, 150 гектараў – пад авёс і 200 гектараў – пад зернебабовыя культуры. Ужо заўтра пачнём вясновую пасўную кампанію. Далей будзем арыентавацца на тэмпературу глебы і надвор’е: наступны ў чарзе яравы ячмень, які непажадана сеяць пры начных замаразках, – расказала Алена Сяргееўна. – Плошча высеву аўсу сёлета была павялічана на 80 гектараў, гэта звязана з патрэбамі свінагадоўлі, нязначна паменшылі плошчу пад яравы ячмень, затое павялічылі пад цукровыя буракі з-за іх высокай рэнтабельнасці ў апошнія гады. На сёння мы завяршылі першую падкормку азімага рапсу, прадаўжаем “карміць” азімыя культуры азотнымі ўгнаеннямі і ўносім угнаенні пад яравую сяўбу, падкормліваем травы, прыступілі да ўнясення арганічных угнаенняў, ужо выйшлі ў поле з плугамі.
– Ці паўплывае бясснежная зіма на падыходы да сезонных работ?
– Самая актуальная праблема – недастатковасць вільгаці ў глебе. Цяпер трэба максімальна аператыўна працаваць з культыватарам, каб яе захаваць. Тым не менш, у новы сезон ідзём з аптымізмам і спадзяёмся на лепшае.
Ва ўрочышчы Яблынька працуюць адразу некалькі адзінак тэхнікі ААТ “Граніт-Агра”: тут уносяць цвёрдыя мінеральныя ўгнаенні пад сяўбу яравых культур і праводзяць культывацыю. За рулём новай тэхнікі – вопытныя механізатары.
Аляксандр Кардаш не толькі медыйная асоба, якую падпісчыкі “Аграблога” ведаюць па байках і вершах, але і аграрый з 37-гадовым стажам. Як пасля школы прыйшоў працаваць у сельскую гаспадарку, так не развітваецца з ёю дагэтуль. Сёлета за стараннасць і выслугу кіраўніцтва ААТ “Граніт-Агра” адзначыла Аляксандра Дзмітрыевіча новым МТЗ-82.3.
– Трактар някепскі, зручны, з кандыцыянерам. Як пакажа сябе ў рабоце, пабачым праз час, – расказвае мужчына. – Пасля ўнясення мінеральных угнаенняў перайду на арганіку, а затым – з касой да самай восені. Настрой баявы, чаго і астатнім жадаю. Трэба своечасова адсеяцца, каб ураджай быў добры.
На магутным энерганасычаным МТЗ-3522 з культыватарам КПМ-10 працуе адзін з самых выніковых механізатараў прадпрыемства Вадзім Майсейчык. Напрыканцы сакавіка будзе год, як ён працуе на новым трактары, на якім стаў пераможцам у конкурсе “Араты-2024” на роднай зямлі.
– Надзейная тэхніка, нараканняў няма, – кажа ён. – Сёння першы дзень прыступіў да культывацыі, думаю, за дні паўтара адолею гэта поле і перайду да наступнага. Скончым ворыва, у красавіку будзем кукурузу сеяць.
Усім, хто гэтымі днямі шчыруе ў полі на вясновых работах, Вадзім Уладзіміравіч пажадаў здароўя, добрага настрою і поспехаў у справах.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#сельское хозяйство #АПК #нашалепшае #нашелучшее
