Адзіны дзень галасавання. Мы павінны цаніць тое, што маем

У межах інфармацыйнай кампаніі, прысвечанай выбарам 2024 года Дзятлаўшчыну наведаў старшыня камітэта па сельскай гаспадарцы Гродзенскага аблвыканкама Дзмітрый Кадргулаў.

Разам з першым намеснікам старшыні райвыканкама – начальнікам упраўлення сельскай гаспадаркі і харчавання райвыканкама Віталіем Шулейкам і генеральным дырэктарам ААТ “Кіруючая кампанія холдынга “Гроднааблсельгастэхніка” Янам Мазуркевічам яны правялі сустрэчу з калектывам ААТ “Дварэцкі льнозавод”, дзе вялі размову пра электаральную кампанію, работу дэпутацкага корпусу, развіццё прадпрыемстваў сельскай гаспадаркі і перапрацоўчай прамысловасці.

Дзмітрый Рафаэльевіч нагадаў, чаму 25 лютага называецца адзіным днём галасавання, і з якой мэтай былі сумешчаны выбары дэпутатаў усіх узроўняў.

– Тое, што важна рабіць свядомы выбар палітыкаў, якія будуць уплываць на дзяржаўны курс і заканатворчы працэс, ведае кожны дарослы грамадзянін, неабыякавы да сваёй краіны, – адзначыў ён. – Сёння неабходна данесці да моладзі думку, што наш дабрабыт – вынік дзяржаўнай падтрымкі ва ўсіх сферах і сумленнай працы пакаленняў беларусаў. Мы павінны цаніць тое, што маем.

Кіраўнік абласнога камітэта па сельскай гаспадарцы падкрэсліў, што кожны грамадзянін краіны мусіць скарыстацца сваім правам выбару дэпутатаў, каб у гэтай сферы працавалі сапраўдныя народныя абраннікі, прафесіяналы сваёй справы. Дэпутаты розных узроўняў складуць трэцюю частку новага ўплывовага органа дзяржаўнай улады – Усебеларускага народнага сходу.

Віталій Шулейка расказаў, што ад Дзятлаўшчыны будзе выбраны 1 дэпутат у Палату прадстаўнікоў Нацыянальнага сходу, 2 – у Гродзенскі абласны Савет дэпутатаў, 25 чалавек – у раённы Савет дэпутатаў.

– Выбірайце дэпутатаў, запамінайце іх прозвішчы і не саромейцеся потым прыходзіць на прыём са сваімі пытаннямі і праблемамі. Мы, дэпутаты, для таго і ідзём на выбары, каб мець магчымасць дапамагаць людзям, – падвёў вынік Віталій Тадэвушавіч.

Ян Мазуркевіч адзначыў, што ААТ “Дварэцкі льнозавод” – у пяцёрцы лепшых у Беларусі, у тым ліку дзякуючы дзяржаўнай падтрымцы, якая выражаецца ў бязвыплатных і выплатных субсідыях, льготных крэдытах.

– Дзяржава сёння не пакідае ўбаку не толькі ваша прадпрыемства, але і ўсе прадпрыемствы дзяржаўнага сектара эканомікі. Наш узровень жыцця відаць з паўсядзённага жыцця беларусаў – не толькі шчырых працаўнікоў, але і актыўных наведвальнікаў магазінаў, кафэ, культурных мерапрыемстваў і месцаў адпачынку. Сёння мы маем магчымасць жыць, працаваць і ўплываць на выбар вектару развіцця роднай краіны. Гэтым трэба ганарыцца і прымаць удзел у ключавых падзеях беларускай гісторыі, такіх як адзіны дзень галасавання.

Аналагічная сустрэча прайшла на ААТ “Новаяльнянскі камбінат хлебапрадуктаў”, дзе акрамя выбарчага заканадаўства былі абмеркаваны планы і праекты, якія будуць рэалізоўвацца ў гарпасёлку ў бягучым годзе.

Наталля АВЯРЧУК

Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga