У другім паўгоддзі 2015 года Дзятлаўскае РУП ЖКГ праводзіць капітальны рамонт чатырох шматкватэрных дамоў у горадзе Дзятлаве: №18 па вуліцы Савецкай; №20 па вуліцы Савецкай; №28 па вуліцы Кастрычніцкай; №24 па вуліцы Перамогі. Ужо зроблена праектна-каштарысная дакументацыя, ідуць падрыхтоўчыя работы. За кошт сродкаў, накіраваных на капітальны рамонт жыллёвага фонду, ва ўсіх гэтых дамах плануецца адрамантаваць дахі, балконы, уцяпліць фасады, замяніць унутрыдамавыя інжынерныя сістэмы ў стаяках агульнага карыстання. А вось пад’езды будуць адрамантаваны за кошт жыхароў, як цяпер гэтага патрабуе закон.
Уласнікі кватэраў павінны ведаць, што калі раней яны прымалі долевы ўдзел у рамонце пад’ездаў, то цяпер аплата за яго поўнасцю кладзецца на іх плечы. Сума пазней будзе адлюстравана ў квітку на аплату. Пастановай Савета Міністраў Рэспублікі Беларусь ад 4 чэрвеня 2014 года №12 вызначаны пералік работ па бягучым рамонце, які поўнасцю аплачваюць жыхары. У яго, у прыватнасці, уваходзяць пафарбоўка-пабелка, аднаўленне тынкоўкі і абліцоўкі ў месцах агульнага карыстання і іншае. Таксама загадам Міністэрства жыллёва-камунальнай гаспадаркі Рэспублікі Беларусь ад 4 лютага 2015 года №5 былі зацверджаны метадычныя рэкамендацыі, якія вызначаюць адзіны парадак планавання і арганізацыі адпаведных работ.
Так, перад рамонтам пад’ездаў жыллёва-камунальныя службы абавязкова арганізоўваюць агульныя сходы жыхароў. Разам яны вызначаюць пералік і якасць матэрыялаў, узгадняюць каляровае вырашэнне, выбіраюць упаўнаважаную асобу ад жыхароў для прыёмкі выкананых работ. Па выніках сходу складаецца пратакол, у якім адлюстроўваюцца прынятыя рашэнні, пазней складаюцца дэфектны акт і лакальны каштарыс, падпісваюцца дагаворы з жыхарамі. Канчатковыя памеры аплаты залежаць ад фактычнага кошту выкананых работ у долі, адпаведнай агульнай плошчы жылых кватэраў, якія займаюць грамадзяне.
Аплата за рамонт пад’езда прад’яўляецца ўсім спажыўцам, у карыстанні якіх знаходзіцца пад’езд, у тым ліку ўласнікам кватэраў, якія адмовіліся ад падпісання дагавора.
Такія сходы ўжо адбыліся ў Дзятлаве з жыхарамі ўсіх чатырох дамоў, якія сёлета будуць капітальна адрамантаваны. Але калі жыхары дамоў №18 і №20 па вуліцы Савецкай і дома №28 па вуліцы Кастрычніцкай змаглі дамовіцца з камунальнікамі аб арганізацыі работы па правядзенні рамонту пад’ездаў, то жыхары дома №24 па вуліцы Перамогі адмовіліся аплачваць рамонт.
Службовыя асобы РУП ЖКГ — намеснік дырэктара па ідэалагічнай рабоце Алег Міхайлавіч Хілімончык і старшы майстар жыллёва-эксплуатацыйнага ўчастка Галіна Мікалаеўна Альшэўская — патлумачылі ўзніклую сітуацыю:
— Мы дзейнічаем згодна з заканадаўствам Рэспублікі Беларусь. Цяпер бягучыя і планавыя рамонты ў пад’ездах павінны аплачваць уладальнікі кватэраў. На жаль, у час агульнага сходу з жыхарамі дома №24 па вуліцы Перамогі мы так і не змаглі прыйсці да канчатковага пагаднення. Уладальнікам кватэраў гэтага дома Дзятлаўскае РУП ЖКГ прапаноўвала некалькі магчымых варыянтаў арганізацыі работ. Першы — скарыстацца ўжо распрацаванай праектна-каштарыснай дакументацыяй на аднаўленне пад’ездаў, дзе вызначаны кошт, матэрыялы і віды работ. Іх выканае арганізацыя-падрадчык, якая будзе праводзіць капітальны рамонт дома. Уладальнікам кватэраў пасля завяршэння рамонту пад’ездаў у гэтым выпадку будзе выстаўлены кошт, прапарцыянальна плошчы займаемага імі жылога памяшкання (кватэры).
Другі варыянт з’яўляецца больш танным: жыхары пад’езда могуць зрабіць рамонт самастойна, наняўшы для гэтага прыватнага прадпрымальніка або работнікаў прыватнага ўнітарнага прадпрыемства.
Трэці варыянт — самы бюджэтны: усе неабходныя работы жыхары пад’езда могуць выканаць самастойна, сваімі сіламі.
Але ў апошніх двух выпадках пад’езды павінны быць адрамантаваны, пакуль ідзе капітальны рамонт дома, да моманту яго здачы ў эксплуатацыю.
Карэспандэнтка газеты пацікавілася, што будзе, калі жыхары дома №24 па вуліцы Перамогі не пойдуць на кампраміс?
— У гэтым выпадку будзем дзейнічаць згодна з законам, — патлумачылі камунальнікі. — Арганізацыя-падрадчык, якая будзе праводзіць капрамонт дома, у абавязковым парадку выканае работы па рамонце пад’ездаў. Затым жыхарам выставім сумы, якія давядзецца аплаціць. Таму, пакуль ёсць час прыняць правільнае рашэнне, якое задаволіць усіх, варта гэтым скарыстацца.
— Але людзі тлумачаць, што спраўна плацілі па квітках на працягу ўсяго перыяду эксплуатацыі дома, цікавяцца, няўжо гэтых грошай не хопіць на рамонт?
— Жылому дому №24 па вуліцы Перамогі — 42 гады, — расказвае старшы майстар жыллёва-эксплуатацыйнага ўчастка Дзятлаўскага РУП ЖКГ Г. М. Альшэўская. — Мы падлічылі, колькі грошай за гэты час яго жыхары пералічылі на капрамонт. Падлік вялі ў чэрвеньскіх цэнах.
Так, за чэрвень 2015 года на капрамонт былі пералічаны 892 106 рублёў. Адпаведна, за мінулы перыяд 2015 года гэта сума склала 5 352 636 рублёў. За ўсе 42 гады жыхарамі сабраны 449 621 424 рублі ў цэнах 2015 года. Усяго за капрамонт аплачана 454 974 060 рублёў. Каштарысны кошт капрамонту дома складае 1 870 517 759 рублёў. Тэндар — 1 700 664 174 рублёў. Сума сродкаў, якіх не хапае (будуць пагашаны за кошт мясцовага бюджэту) — 1 245 690 114 рублёў. Цяпер можна падлічыць, што калі б жыхары дома №24 па вуліцы Перамогі спрабавалі сабраць гэтыя грошы самастойна, ім бы давялося плаціць адлічэнні на капітальны рамонт яшчэ на працягу 80 гадоў. Мы жывём у прававой дзяржаве, дык давайце разам знойдзем кампраміс у вырашэнні ўзніклай праблемы. Закон існуе для ўсіх, і парушаць яго ніхто не мае права.
Падрыхтавала да друку І. ЛЕАНІДАВА
