Напярэдадні Дня пажылых людзей адбылося ўшанаванне ветэранаў працы – былых кіраўнікоў прадпрыемстваў аграпрамысловага комплексу Дзятлаўшчыны. Другі год запар святочную сустрэчу для іх ладзяць раённы выканаўчы камітэт і райкам прафсаюза работнікаў аграпрамысловага комплексу.
Гасцей павіталі, пацікавіліся пра жыццё і настрой старшыня райвыканкама Аляксандр Дубовік і старшыня райкама галіновага прафсаюза Уладзімір Казак. На некалькі хвілін затрымаліся для калектыўнага фотаздымка – і накіраваліся ў ААТ “Граніт-Агра”, якое сёлета было выбрана пляцоўкай для сустрэчы.
Дырэктар гаспадаркі Станіслаў Мазур запрасіў шаноўных гасцей на невялікую экскурсію па адміністрацыйным будынку, расказаў ім аб працоўных поспехах сельгаспрадпрыемства:
– “Граніт-Агра” – вялікая гаспадарка: 8640 гектараў сельгасугоддзяў, з якіх 7123 гектары – ворыва, дойны статак складае 1765 галоў, усяго буйной рагатай жывёлы – 4491 галава, свіней – 17222. Цяпер у ААТ “Граніт-Агра” працуюць 446 чалавек. Сёлета гаспадарка намалаціла амаль 14 тысяч тон каласавых і зерене-бабовых, ураджайнасць склала 43,7 цэнтнера з гектара. Валавы збор рапсу – 2030 тон. Яшчэ разлічваем намалаціць 3,5 тысячы тон кукурузы – і зерне-фуражом будзем забяспечаны. Травяністых кармоў нарыхтавалі 108% да плана, сенажу – каля 17 тысяч тон, ідзе нарыхтоўка сіласу, якога плануем закласці 19 тысяч тон. Завяршаем палявыя работы.
Затым удзельнікі сустрэчы наведалі Круцілавіцкі дзіцячы сад-сярэднюю школу. Дырэктар установы Сяргей Гузоўскі і кіраўнік школьнага музея Сяргей Каско прапанавалі гасцям экскурсію ў музей, адна з экспазіцый якога – “Працаўнікам вёскі – слава” – адлюстроўвае гісторыю мясцовай сельгасвытворчасці. Тут сабраны матэрыялы аб вытворчых працэсах розных гадоў, людзях, якія ўнеслі значны ўклад у развіццё галіны — жывёлаводах, механізатарах, паляводах, кіраўніках сельгаспрадпрыемстваў, якія раней знаходзіліся на тэрыторыі сучаснага ААТ “Граніт-Агра”.
Напрыканцы экскурсіі кіраўнік школьнага музея Сяргей Каско ўручыў Веры Калач, заслужанай работніцы сельскай гаспадаркі, былому галоўнаму аграному калгаса “Беларусь”, былому старшыні калгаса “Чырвоны кастрычнік”, памятны знак “За значны ўклад у развіццё сельгасвытворчасці”. Падобныя ўзнагароды ў час адкрыцця музейнай экспазіцыі былі ўручаны яшчэ шэрагу мясцовых перадавікоў вытворчасці.
Удзельнікі сустрэчы таксама наведалі мехдвор ААТ “Граніт-Агра”, мелі магчымасць пагутарыць і ўзгадаць мінулае. На развітанне кожны ветэран працы атрымаў памятны падарунак.
І. Каўкель
Фота аўтара
