Сонцам, бадзёрасцю, цеплынёй, пахам лугавых траў сустракала аграсядзіба “Каля дуба” і яе гаспадары Сяргей і Жанна Калпінскія ўдзельніц раённага сацыяльна-актыўнага праекта да Года беларускай жанчыны “Зарадка з лідарам”. На гэты раз у якасці лідара на мерапрыемства была запрошана начальнік аддзела адукацыі райвыканкама Марына Лашкоўская, а ў спартыўны строй на зарадку побач з ёй сталі кіраўнікі ўстановаў адукацыі Дзятлаўшчыны.
Нагадаем, што праект ініцыяваны сектарам спорту райвыканкама пры падтрымцы аддзела ідэалагічнай работы і па справах моладзі райвыканкама, раённай арганізацыі ГА “Беларускі саюз жанчын”, раённага Цэнтра культуры і народнай творчасці.
Прысутных павіталі і пажадалі ім пазітыўных эмоцый і добрага настрою галоўны спецыяліст сектара спорту райвыканкама Наталля Калодка і лідар раённага жаночага руху Алена Васкель, а гаспадыня Жанна Калпінская заклікала жанчын за час сустрэчы наталіцца сонцам, свежым паветрам і надоўга зарадзіцца энергіяй ад прыроды.
Практыкаванні з жанчынамі выканала фітнес-інструктар Ала Аблажэй.
Традыцыйна за актыўнай часткай удзельніц чакала шчырая размова-інтэрактыў “Лідар без купюр” з Марынай Лашкоўскай, у час якой кіраўнік сферы адукацыі адказала на пытанні з фітнес-бокса і падзялілася ўласнымі лайфхакамі, як ёй удаецца быць прыгожай, паспяховай, гарманічнай кожны дзень. Прыемным дапаўненнем да гутаркі сталі сельская цішыня і духмяны чай са свежай мятай, які прапанавала гасцям Жанна Калпінская.
Пытанні для лідара:
– Якую якасць лічыце галоўнай для сябе як кіраўніка?
– Мяккую жаночую дыпламатыю.
– Ідэальны адпачынак для вас?
– Сельская цішыня, такая, як на сядзібе “Каля дуба”.
– Якімі трыма важнымі якасцямі павінен валодаць чалавек, каб вы ўзялі яго ў зборную лідараў адукацыі раёна?
– Вышэй, хутчэй, мацней, як пры здачы нарматываў “Гатовы да працы і абароны”.
– З чаго складаецца поспех сістэмы адукацыі нашага раёна?
– Любы поспех – гэта людзі: навучэнцы, бацькі, педагогі і, безумоўна, каманда кіраўнікоў, бо нічога не робіцца само па сабе без намаганняў, волі і паўсядзённай працы.
– Як часта жаночая інтуіцыя дапамагае вам прымаць складаныя кадравыя і стратэгічныя рашэнні?
– Інтуіцыя ў мяне ёсць, аднак да прыняцця важных рашэнняў падыходжу вельмі ўдумліва і ўзважана, абмяркоўваю іх з калегамі, і толькі ў час гэтага працэсу могуць адбыцца карысныя інтуітыўныя “падказкі”.
– Якая выпрацаваная гадамі звычка дапамагае вам пры рашэнні складаных стрэсавых задач?
– Актыўнасць думак, іх хуткасць. Заўжды нараджаецца некалькі магчымых варыянтаў, а потым пэўныя з іх увасабляю ў жыццё.
– Ці быў у вашай педагагічнай кар’еры момант, калі хацелася ўсё кінуць і пайсці ў іншую сферу?
– Ніколі. Я заўжды хацела быць настаўнікам, нічога не жадаю мяняць.
– Як захоўваць унутраную гармонію і не выгараць на кіраўнічай рабоце?
– Любіць сябе ў добрым сэнсе гэтага слова: клапаціцца аб сваім псіхалагічным стане, унутранай гармоніі, фізічным здароўі, больш пакідаць часу на сябе, правільна дэлегаваць задачы, давяраць калегам, у тым ліку маладым.
– Тры галоўныя словы, якімі можна апісаць ідэальнага лідара.
– Крэатыўны, мудры, сумленны.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
