Канікулы, як і навучальны год, павінны быць цікавымі і насычанымі. Каб выканаць дадзеную аксіёму, мы, навучэнцы 10 класа сярэдняй школы № 1 горада Дзятлава імя А. М. Чурылы, у рамках рэалізацыі школьнага турыстычнага маршруту “Свой край ведай, любі, вывучай” адправіліся на аднадзённую веласіпедную экскурсію.
Арганізатарам і кіраўніком паходу выступіла наш класны кіраўнік Наталля Белаус. Маршрут “Дзятлава – Курпешы – Раклевічы – Дзятлава” быў старанна спланаваны з улікам нашай фізічнай падрыхтоўкі, лагістыкі прыпынкаў і ўмоваў надвор’я.
Значным этапам маршруту стала наведванне месца пахавання яўрэяў, расстраляных фашысцкімі акупантамі ў 1942 годзе паблізу вёскі Курпешы. Там мы ўсклалі кветкі да помніка ахвярам фашызму і ўшанавалі іх памяць хвілінай маўчання. Гэты момант стаў жывым урокам гісторыі і асэнсавання каштоўнасці міру і грамадзянскага абавязку: мы ўзгадалі пра трагічныя падзеі Вялікай Айчыннай вайны на Дзятлаўшчыне, абмеркавалі значэнне захавання гістарычнай памяці.
Пасля эмацыйна насычанай часткі велапаездкі наша група зрабіла прывал на спецыяльна падрыхтаванай пляцоўцы. Тут пад кіраўніцтвам педагога прайшлі спартыўныя эстафеты, рухомыя гульні на свежым паветры і камандныя чэленджы.
Нягледзячы на фізічную нагрузку, усе ўдзельнікі вярнуліся ў горад з яркімі ўражаннямі і эмоцыямі. Аднакласнікі прызналіся, што маршрут запомніцца надоўга, а спалучэнне гісторыі, спорту і стасункаў на свежым паветры зрабілі дзень па-сапраўднаму асаблівым і займальным. Гэта нашы апошнія бесклапотныя школьныя канікулы, упэўнены, што мы правядзём іх выдатна!
Зарына МАКАРЧУК,
Паліна ПАЛУНОСІК,
юныя журналісты газеты “Перамога”, навучэнцы 10 класа сярэдняй школы № 1 г. Дзятлава імя А. М. Чурылы
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
