Другі раз запар у Беларусі прайшоў рэспубліканскі міжведамасны адукацыйны праект “Запусці сэрца”, арганізатарамі якога выступаюць Беларускае таварыства сімуляцыйнага навучання ў медыцыне, Міністэрствы аховы здароўя і адукацыі.
Каманда дзесяцікласнікаў Казлоўшчынскай сярэдняй школы на чале з педагогам Тамарай Буяк прыняла ўдзел у рэгіянальным этапе акцыі. З выкладчыкамі Слонімскага дзяржаўнага медыцынскага каледжа яны адпрацавалі тэарэтычныя веды і практычныя навыкі па сардэчна-лёгачнай рэанімацыі і спыненні крывацёкаў. Нашы землякі папоўнілі састаў дэлегацыі Гродзенскай вобласці, у якую ўваходзіла 150 маладых жыхароў Прынёмання.
Фінальная сустрэча праекта адбылася ў Мінск-Арэне, дзе сустрэліся прадстаўнікі з усёй краіны і разам запусцілі сімвалічнае сэрца Беларусі. У сталіцы Казлоўшчынскую сярэднюю школу прадстаўлялі дзесяцікласнікі Артур Лішык, Арсеній Лішык, Вікторыя Барук, Ніка Добыш, Анастасія Леждзей. Цяпер кожны з іх умее аказваць неадкладную дапамогу.
“Моладзь за здароўе дзеля жыцця на зямлі”
Навучэнцы Казлоўшчынскай сярэдняй школы сталі лаўрэатамі рэспубліканскага конкурсу сацыяльных праектаў “Моладзь Беларусі за жыццё, маральнасць і сямейныя каштоўнасці”, які праходзіць пад патранажам дабрачыннага Фонду падтрымкі сям’і, мацярынства і дзяцінства “Пакроў”. Удзел у конкурсе школа прымала трэці год запар. Сёлета з праектам “Энергія жыцця” па захаванні рэпрадукцыйнага здароўя (кіраўнікі Тамара Буяк і Жанна Цяцерына) заявіліся ў намінацыі “Моладзь за здароўе дзеля жыцця на зямлі”.
На працягу года вучні 11-га і 9 “Б” класаў выконвалі прапанаваныя заданні, папаўнялі свае веды аб здароўі і прапагандавалі здаровы лад жыцця сярод землякоў. Калектыў установы дзякуе за плённае супрацоўніцтва ў рамках праекта спецыялісту райЦГЭ Наталлі Юрэні, доктару-гінеколагу Дзятлаўскай ЦРБ Таццяне Данільчык, святарам Навагрудскай епархіі, якія прывозілі ў школу перасоўную выставу па папярэджанні абортаў, і ўсім, хто падтрымліваў у рэалізацыі праекта.
Ірына СТЫРНІК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
#нашелучшее #нашалепшае
