Беларусь памятае
У Гезгалаўскай сярэдняй школе імя М. І. Нядзеліна ў 6 класе прайшоў выніковы занятак у рамках рэспубліканскай навучальнай праграмы “Я. Мая сям’я. Мая Радзіма” па тэме “Подзвігі піянераў-герояў у гады Вялікай Айчыннай вайны”. На мерапрыемства былі запрошаны першы сакратар раённага камітэта ГА “БРСМ” Кацярына Хілімончык, педагог-арганізатар школы Наталля Ліцкевіч і бібліятэкар Ала Ненартовіч.
“Хто ж такі сучасны герой?” – самыя розныя адказы навучэнцаў на гэта пытанне дазволілі вывесці адзіную формулу. Гэта смелы і моцны, бясстрашны і мужны чалавек, які любіць сваю Радзіму, патрыёт і сапраўдны грамадзянін. Бібліятэкар школы пазнаёміла прысутных з серыяй кніг, якія расказваюць пра нялёгкія лёсы і несмяротныя подзвігі адважных юных партызан. Шасцікласнікі і класны кіраўнік падзяліліся гісторыямі аб ваенным шляху сваіх прадзедаў.
Кацярына Уладзіміраўна адзначыла, што і сёння кожны з нас можа быць героем і здзяйсняць подзвігі – дастаткова любіць сваю Радзіму, быць сумленным і справядлівым, імкнуцца карыснымі і добрымі ўчынкамі ўпрыгожыць жыццё сваё і сваіх блізкіх.
У канцы мерапрыемства перад навучэнцамі выступілі юнармейцы атрада “Ракета”, пераможцы раённага этапу ваенна-патрыятычнай гульні “Зарніца”.
“Гісторыя вайны і Перамогі ў асобах маёй сям’і”
Так называлася першая дзіцячая навукова-даследчая канферэнцыя, якая адбылася ў гімназіі № 1 горада Дзятлава. Мерапрыемства праходзіла ў рамках канцэпт-ініцыятывы вучнёўскага савета “Я памятаю! Я ведаю! Я ганаруся!”, прымеркаванай да 80-годдзя Вялікай Перамогі. Навучэнцы 2-10 класаў сумесна з бацькамі і педагогамі вывучалі сямейныя фотаархівы, працавалі з пошукавай сістэмай “Партызаны.бай” і прадставілі свае напрацоўкі.
Дыпломамі гран-пры ўзнагароджаны Валерыя Данільчык, Арцём і Мар’яна Конаны, Мілана Сербін, Арсеній Добыш.
Дыпломамі I, II, III ступеняў адзначаны Паліна Каткоўская, Маргарыта Дораш, Ксенія Золатава, Міхаіл Свіб, Марыя Панасевіч.
Гартаючы старонкі сямейнага альбома
У Новаяльнянскай сярэдняй школе імя А. А. Шаўчук у рамках цыкла заняткаў “Я. Мая сям’я. Мая Радзіма” ў 9 класе прайшоў занятак “Памятаем. Ганарымся!”, на які былі запрошаны намеснік начальніка аддзела адукацыі райвыканкама Таццяна Умоўская, бібліятэкар Марыя Юрчык, навучэнка 10 класа Дар’я Піваварчык.
Вучні расказалі пра камсамольцаў-герояў, іх подзвіг. Марыя Юрчык, унучка Аляксандры Шаўчук, заслужанага настаўніка БССР, ветэрана вайны, імя якой носіць установа адукацыі, – пра жыццё сваёй бабулі, яе ўзнагароды. Дар’я Піваварчык прадставіла сваю даследчую працу “Гісторыя сем’яў Піваварчык-Мароз у гады Вялікай Айчыннай вайны”, якую абараніла на рэспубліканскім конкурсе “Гартаючы старонкі сямейнага альбома”, а таксама прыняла ўдзел у Міжнародным конкурсе “Ратная слава Расіі” і ўзнагароджана дыпломам І ступені.
Тата, мама, я – спартыўная сям’я
У рамках акцыі “Разам за моцную і здаровую сям’ю” ў Раклевіцкай базавай школе пад такой назвай адбылося спартыўнае свята. На старт выйшлі сямейныя каманды. Ключавая ўмова ўдзелу – быць прыхільнікамі здаровага ладу жыцця ці гатовым папоўніць іх рады. Удзельнікі прайшлі ўсе этапы выпрабаванняў, былі ўзнагароджаны граматамі і медалямі.
Падрыхтавала Таццяна САНЮК
#Дятловщина #образование
