Колькі шлюбаў было зарэгістравана ў 2016 годзе? Колькі нарадзілася дзетак? Якія імёны найчасцей ім давалі? На гэтыя і іншыя пытанні адказала начальнік аддзела ЗАГС Дзятлаўскага райвыканкама Вольга Бародзіч.
— Ці шмат пар у Дзятлаўскім раёне ў 2016 годзе захацелі афіцыйна аформіць свае адносіны?
— Усяго летась пабраліся шлюбам 133 пары, з іх большасць, 102, – у аддзеле ЗАГС Дзятлаўскага райвыканкама. У сельскай мясцовасці найбольш зарэгістраваных актавых запісаў па шлюбах у Жукоўшчынскім, 12, і Казлоўшчынскім, 8, сельвыканкамах.
— Цікава, а кахаць здольныя ў любым узросце?
— Сярэдні ўзрост нявестаў – 26 гадоў, а жаніхоў – 29. Летась самай маладой нявесце яшчэ не споўнілася 18 гадоў, а двум жаніхам і двум нявестам было больш за 60.
— Вольга Вацлаваўна, мяркую, многім будзе цікава, колькі ж дзетак нарадзілася ў мінулым годзе?
— У раёне зарэгістравана нараджэнне 222 немаўлят. З іх 121 хлопчык і 101 дзяўчынка.
— Ці былі двойні, тройні?
— Тройняў у мінулым годзе не нарадзілася, а вось двайное шчасце з’явілася ў адной сям’і.
— Пэўна, найбольш першынцаў?
— Не, найбольш дзетак нарадзіліся другімі ў сям’і – 91, першынцаў было 79. А вось у шасці сем’ях нарадзілася нават па пятым дзіцяці.
— Цікава, а бацькі – усе беларусы?
— Трое татаў былі з Латвіі, Расіі і Украіны, а вось матуляў-іншаземак – 7: адна грузінка, дзве расіянкі і тры ўкраінкі.
— У якім узросце найчасцей станавіліся бацькамі?
— Калі падлічыць сярэдні ўзрост, то для матуляў гэта – 27 гадоў, а для татаў – 30. Самай маладой маме было менш за 18 гадоў, а самаму маладому тату – 18.
— Пэўна ж, бацькамі станавіліся і людзі больш сталага ўзросту?
— Так, сем жанчын сталі матулямі пасля 40 гадоў, а двум татам было больш за 50.
— Цікава, як часцей за ўсё называлі дзетак у 2016 годзе?
— Самымі папулярнымі імёнамі для дзяўчынак сталі Дар’я, Валерыя, Ксенія, а для хлопчыкаў – Максім, Арцём, Аляксандр.
— А ці выбіралі бацькі для сваіх немаўлятак якія-небудзь рэдкія імёны?
— Толькі па адным разе ў 2016 годзе дзяўчынак называлі Агнэшка, Варвара, Ева, Кіра, Эльвіра, Яна, а хлопчыкаў – Артур, Уладзімір, Даніла, Міраслаў, Назар, Алег.
— Што пажадаеце і маладажонам, і бацькам у 2017 годзе?
— Захоўваць сямейнае цяпло, любіць адзін аднаго, дарыць пяшчоту. І няхай дзеткі радуюць бацькоў, растуць здаровымі і разумнымі.
Гутарыла С. ГРЫШЫНА
