Удзельнікам Усебеларускага народнага сходу ў свой час быў наш зямляк Валерый Макарчык, які цяпер з’яўляецца старшынёй Дзятлаўскага раённага аб’яднання прафсаюзаў.
Напярэдадні новага ўсерэспубліканскага форуму Валерый Вячаслававіч падзяліўся думкамі наконт гэтай важнай для краіны падзеі.
– З уласнага вопыту ўдзелу ва Усебеларускім народным сходзе магу зазначыць, што гэта – адкрыты ўсерэспубліканскі дыялог, дзе кожны з удзельнікаў ад імя працоўнага калектыву, арганізацыі ці грамадскага аб’яднання можа падымаць пытанні і праблемы, якія хвалююць людзей, а таксама ўносіць свае канструкцыйныя прапановы.
Як многія памятаюць, на V Усебеларускім народным сходзе ў ліку галоўных пытанняў, якія падымалі прадстаўнікі прафсаюзаў, былі – неабходнасць захавання сацыяльна арыентаванага падыходу ў эканоміцы, пры развіцці нашых прадпрыемстваў, у рабоце з працоўнымі калектывамі. А гэта – бясплатная медыцына і адукацыя, даступныя камунальныя паслугі і падтрымка сем’яў з дзецьмі, занятасць і заработная плата мільёнаў беларусаў. Мы не страцілі ўсяго гэтага за мінулую пяцігодку, а збераглі і памножылі.
На дадзеным этапе прафсаюзы вядуць планамерную работу па стварэнні сваіх пярвічак у арганізацыях з прыватнай формай уласнасці, дзе колькасць работнікаў дазваляе гэта зрабіць. Павысіць сацыяльную падтрымку і абароненасць працоўных калектываў у прыватным сектары эканомікі – адна з галоўных задач прафсаюзаў на бліжэйшую перспектыву. Напрыклад, на Дзятлаўшчыне за 2020 год былі створаны 4 новыя прафсаюзныя пярвічкі, 2 з якіх – у прыватных арганізацыях. Сёлета ўжо рыхтуюцца дакументы на стварэнне яшчэ 4 такіх пярвічак у прыватных арганізацыях.
На VI Усебеларускім народным сходзе прафсаюзы плануюць абмеркаваць тыя прапановы, што паступілі для ўнясення змяненняў у Канстытуцыю, сярод не менш важных тэмаў падрыхтаваных прафсаюзамі для абмеркавання на форуме – далейшы рост даходаў і ўзроўню жыцця людзей, медыцынскае страхаванне членаў прафсаюза, прававая абарона работнікаў і іншыя.
Дзятлаўшчыну на VI Усебеларускім народным сходзе ў складзе дэлегацыі будзе прадстаўляць старшыня раённага выканаўчага камітэта Андрэй Садоўскі. Кандыдатура Андрэя Уладзіміравіча была прапанавана Гродзенскай абласной арганізацыяй Беларускага прафсаюза работнікаў дзяржаўных і іншых органаў, як члена гэтага прафсаюза.
Ірына СТЫРНІК
Фота Вольгі ЮШКЕВІЧ
