Дзятлаўчане пабывалі на прэм’еры фільма “Чорны замак”

12 верасня ў кінатэатры “Беларусь” горада Мінска прайшоў прэс-паказ новай кінастужкі 2024 года “Чорны замак”, знятага на аснове рамана Уладзіміра Караткевіча “Чорны замак Альшанскі”.

Стужка знятая на Нацыянальнай кінастудыі “Беларусьфільм” і расійскай “Нью Арт Сінема Прадакшн”.

Першымі кінагледачамі сталі журналісты з усіх рэгіёнаў Беларусі, сталічных СМІ, навучэнцы факультэта журналістыкі.

Першапачаткова жанр фільма заяўляецца як гістарычны дэтэктыў на стыку з фэнтэзі. На экране пераплятаюцца падзеі мінуўшчыны і нашага часу, якія звязвае знойдзенае старажытнае Евангелле 16 стагоддзя.

Кніга, як якар, злучыла дзве эпохі, якія перадаюцца гледачам вачамі галоўнага героя Антона – выкладчыка, гісторыка, які вывучае артэфакты. Толькі на кароткі час у рукі яго і сябра трапляе Евангелле, на старонках якога яны знаходзяць зашыфраванае пасланне.

У час паказу стужкі творчая здымачная група сустрэлася з журналістамі. Гэта былі аўтар сцэнарыя, прадзюсар Глеб Шпрыгаў, народны артыст Расійскай Федэрацыі Віктар Вяржбіцкі, рэжысёр-пастаноўшчык Кірыл Кузін, мастак-пастаноўшчык Наталля Навоенка, намеснік галоўнага дырэктара Нацыянальнай кінастудыі “Беларусьфільм” Павел Скалабан.

– Мы імкнуліся зрабіць “вялікае кіно”, ёсць такі жанр, які шмат чаго ў сябе ўключае, – адзначыў Глеб Шпрыгаў. – Як бы мы далёка не зайшлі па змесце, ёсць шмат перасячэнняў з раманам Уладзіміра Караткевіча, перадаць такі складаны шматслойны твор – задача няпростая. Мы змагаліся за кожную хвіліну, спачатку стужка была працягласцю тры гадзіны, потым скарацілі яе да дзвюх. Проста хацелася шмат чаго “сказаць”, што і як атрымалася – ацэньваць гледачам.

Мяркуецца, што ў кінапракат “Чорны замак” выйдзе ў снежні гэтага года, а ў лютым 2025-га будзе даступны для прагляду ў інтэрнэце.

Сярод асноўных акцёраў: Віталь Кішчанка (Расія) – у ролі Вітаўта Гальшанскага, беларусы Яўген Швец – Антон Косміч і Анастасія Красоўская – Гардзіслава, іншыя.