У Хвінявіцкай сярэдняй школе з удзелам навучэнцаў, педагогаў і прадстаўнікоў мясцовай улады прайшла ўрачыстая лінейка, прысвечаная перадачы вымпела “За мужнасць і стойкасць у гады Вялікай Айчыннай вайны”, якім горад Дзятлава быў адзначаны да 80-годдзя вызвалення Беларусі ад нямецка-фашысцкіх захопнікаў.
Знамённая група Вензавецкай сярэдняй школы разам са старшынёй Вензавецкага сельвыканкама Алегам Шымко прывезла ўзнагароду ў Хвінявічы, каб урачыста перадаць пераможную эстафету калектыву навучальнай установы.
– Для нашай школы вялікі гонар і павага атрымаць вымпел “За мужнасць і стойкасць у гады Вялікай Айчыннай вайны”, якім па заслугах быў узнагароджаны горад Дзятлава, – адзначыла намеснік дырэктара Хвінявіцкай сярэдняй школы Алена Русін. – Мы шануем памяць тых, хто заваяваў для нас мір цаной свайго жыцця. Жадаю, каб над галавой заўсёды было мірнае неба, каб кожны новы дзень дарыў беларусам шчасце, радасць, вясёлыя ўсмешкі і звонкі смех дзяцей. Няхай адгалоскі вайны застануцца толькі ў кнігах і фільмах, а ў нашых сэрцах жыве гонар за подзвігі герояў Дзятлаўскага раёна.
Школьнікі ўшанавалі памяць землякоў, загінулых у гады Вялікай Айчыннай вайны, усклаўшы кветкі да помніка.
98-гадовая мясцовая жыхарка, ветэран педагагічнай працы Хвінявіцкай сярэдняй школы Еўдакія Улога, якая была падлеткам у гады Вялікай Айчыннай вайны, страціла на франтах братоў і бацьку, з таго самага дня, як прачытала ў раённых СМІ аб высокай узнагародзе, марыла ўбачыць вымпел на свае вочы. На ўрачыстай цырымоніі перадачы жанчына не змагла быць з-за праблем са здароўем. Аднак яе жаданне было выканана: у госці да Еўдакіі Рыгораўны разам з вымпелам завіталі хвінявіцкія школьнікі, намеснік дырэктара Хвінявіцкай сярэдняй школы Таццяна Санцэвіч і кіраўнік спраў Парэцкага сельвыканкама Наталля Бакшук. Са слязамі радасці на вачах і словамі ўдзячнасці жанчына сустрэла гасцей:
– Дзякуй вам за гэты вялікі гонар – дакрануцца да вымпела “За мужнасць і стойкасць у гады Вялікай Айчыннай вайны”, аб якім столькі чула і чытала. Вы натхнілі мяне на далейшае жыццё. Я вельмі рада, што Дзятлаўшчына ўзнагароджана такой высокай, сапраўднай і вельмі важнай узнагародай. Яе заслужыў увесь наш народ: мае родныя Магілёўшчына і Дзятлаўшчына, мая сям’я, землякі – усе набліжалі Вялікую Перамогу. У тым, што горад Дзятлава быў удастоены вымпела – заслуга ўсіх пакаленняў: і старэйшага, якое вызваляла горад і нашу краіну ад нямецка-фашысцкіх захопнікаў, і малодшых, якія шануюць і ўвекавечваюць памяць аб ратным гераізме продкаў.
Наталля АВЯРЧУК
Подписывайтесь на телеграм-канал «Дятлово ОНЛАЙН» по короткой ссылке @gazeta_peramoga
