Ёсць пабудова – павінен быць дакумент

Важнае Эканоміка і сельская гаспадарка

Пракуратура Дзятлаўскага раёна правяла праверку выканання зямельнага заканадаўства на адміністрацыйнай тэрыторыі Вензавецкага сельскага савета.

Вынікі нагляднай праверкі паказалі, што службовымі асобамі Вензавецкага сельскага выканаўчага камітэта патрабаванні заканадаўства выконваюцца неналежным чынам і не ў поўнай меры. Пры аглядзе дваровых тэрыторый жылых дамоў у вёсках Сачыўляны, Міроўшчына, аграгарадку Вензавец было ўстаноўлена, што там пабудавана вялікая колькасць гаражоў і драўляных хлявоў, якія належаць гаспадарам дамоў. Будынкі ўзведзены каля 30-40 гадоў таму самавольна: землекарыстальнікі не афармлялі праваўстанаўліваючых дакументаў на зямельныя ўчасткi, не плацілі зямельнага падатку або арэнднай платы за карыстанне зямельнымі ўчасткамі.

Так, насупраць двухкватэрных жылых дамоў па вуліцы Рачной у Сачыўлянах іх жыхары незаконна на зямельных участках узвялі драўляныя гаражы, альтанкі для адпачынку. Акрамя таго, жыхар дома № 8 па вуліцы Рачной у гаспадарчым праездзе без адпаведнага дазволу самавольна пабудаваў драўляны хлеў для інвентару і дроў. Гаспадарчы праезд загрувашчаны на вялікай плошчы непасечанымі калодкамі, якія ляжаць доўгі час.

Аналагічным чынам самавольнае землекарыстанне ажыццяўляецца жыхарамі аграгарадка Вензавец каля шматкватэрных жылых дамоў № 3 і № 4 па вуліцы Новай. Жыхары шматпавярховых дамоў у вёсцы Міроўшчына каля сваіх гаспадарчых пабудоваў на зямельных участках, якія выдзелены для агульнага карыстання, захоўваюць гной, у двары ўстаноўлена металічная будка.

Як паказала пракурорская праверка, у гэтых населеных пунктах службовыя асобы Вензавецкага сельвыканкама не праводзілі кантрольных мерапрыемстваў і мераў па вызваленні незаконна занятых зямельных участкаў не прымалі.

Вынесена пракурорскае прадстаўленне з патрабаваннямі прыняць меры па ліквідацыі выяўленых парушэнняў.

Алег ВЯЛІЧКА,
пракурор Дзятлаўскага раёна

Подписывайтесь на телеграм-канал «Гродно Медиа Group» по короткой ссылке @GrodnoMediaGroup